సినీ జీవితంలో ఒక స్టార్ హీరోయిన్ గా ఎదిగిన నటి రాధిక.. తన సినీ రంగ జీవితంలో ఎన్నో ఒడిదుడుకులను ఎదుర్కొని ఇండస్ట్రీలో నిలదొక్కుకున్న నటి రాధిక. అయితే రాధిక పెళ్లిళ్ల విషయం అందరికి తెలిసిందే. అలా పెళ్లిళ్లు చేసుకున్న రాధికను అందరూ వేలెత్తి చూపే ముందు ఒకసారి తను ఏ పరిస్థితుల్లో అలా పెళ్లిళ్లు చేసుకోవాల్సి వచ్చింది అనే విషయాన్ని తెలుసుకోవాలి. అయితే ఆ పెళ్లిళ్లే తన జీవితాన్ని ఎన్నో చేదు అనుభవాలను మిగిల్చాయి. ఎంతటి బాధను రాధికా అనుభవించిందో చాలామందికి తెలియదు. రాధిక పెద్ద స్టార్ హీరోయిన్. కానీ తనలో ఉన్న లోపం ఏంటంటే తన గురించి తాను పట్టించుకోకపోవడం. పెళ్లి విషయంలోను అదే తొందరపాటు నిర్ణయం తీసుకుంది.

1984 లో నటుడు, క్రెయేటర్, దర్శక, నిర్మాత అయిన ప్రతాప్ పోతాన్ తో రాధికకు పెళ్లి జరిగింది. అలాగే ఆయన బాగా డబ్బున్న వాడు, ఒక క్రియేటివ్ అలాగే చాలా మంచివాడు అనుకుని పెళ్లి చేసుకుంది. కానీ, అతడు ఒక మనసు లేని వ్యక్తి అని రాధికకు తెలియటానికి ఎన్నో రోజుల సమయం పట్టలేదు. పెళ్లి జరిగిన రెండు సంవత్సరాలకే అతని వ్యక్తిత్వం గురించి తెలుసుకుని, అతనితో ఇమడలేక ఇద్దరూ విడిపోవడం జరిగింది.

అయితే విడాకుల తర్వాత ప్రతాప్ పోతన్ రాధిక వ్యక్తిత్వం గురించి ప్రెస్ మీట్ పెట్టి మరీ రాధిక అలాంటిది.. ఇలాంటిది.. అని మీడియా ముందు రాధికా గురించి చెడుగా చెప్పటానికి ట్రై చేశాడు. కానీ, తన గురించి తన భర్త ఇంత చెడుగా చెబుతున్నా కానీ ఒక్క మాట కూడా తన భర్త గురించి చెడుగా చెప్పలేదు అంటే రాధిక వ్యక్తిత్వం ఏంటో అర్ధం అవుతుంది. 1986 లో వీరు ఇద్దరు విడాకులు తీసుకుని విడిపోయారు. కానీ ఆ ప్రభావం వృత్తి మీద పడనీయకుండా సినిమాల్లో నటిస్తునే వచ్చింది. అలాగే ఆ సమయానికి తాను ఒక స్థాయిలో ఉంది కూడా. నిజానికి ఒక వైఫల్యం నుంచి మనం ఒక పాఠం నేర్చుకోవాలి. లేదంటే ఆ వైఫల్యమే మరొక వైఫల్యానికి కారణం అవుతుంది అని గుర్తుపెట్టుకోవాలి. కానీ రాధిక వైఫల్యాన్ని పాఠం లాగా నేర్చుకోలేదు.

మళ్ళీ ఒక బ్రిటన్ దేశస్థుడు అయిన రిచర్డ్ హార్డ్ ను పెళ్లి చేసుకుంది. అయితే ఈ బంధం కూడా ఎన్నో రోజులు నిలవలేదు. అయితే ఆ పెళ్లి జీవితంలో చేసిన అతి పెద్ద తప్పుగా రాధిక ఇప్పటికీ చెబుతూనే ఉంటుంది. ఒక బాధను ఎలా అర్థం చేసుకోవాలి అన్న విషయం అతనికి తెలియదు. ఆ విషయం తెలుసుకునే సమయానికి రాధిక ఆస్తి సగభాగం వరకూ కోల్పోవాల్సిన పరిస్థితి వచ్చింది. కొద్దికాలం తర్వాత మళ్ళీ ఆ బంధం తెగిపోయింది. సినీ ఇండస్ట్రీలోకి వచ్చి ఎన్నో సంవత్సరాలు అయింది రాధికకు. అయితే వాళ్ళిద్దరి ప్రేమకు అనుబంధంగా ఒక కూతురు పుట్టింది. ఆమె పేరు రేయాన్. అయితే ఆ కూతురే తన జీవితం, సర్వస్వంగా అనుకుంది. తెలుగు, హిందీ, కర్ణాటక, మలయాళం ఇలా అన్ని భాషల సినిమాల్లో నటించేసింది రాధిక. దాదాపు అందరి స్టార్ హీరోలతో నటించేసింది. అయితే ఒకానొక సమయంలో క్రమంగా వెండితెర మీద రాధిక నల్లపూస అయిపోయింది. అసలు సినిమాలు చేయడమే ఒకానొక సందర్భంలో మాని వేసింది. ఆస్తి మొత్తం కరిగిపోయింది. ఎక్కడా లేని అప్పులు అప్పుడు గానీ తనకు తెలిసి రాలేదు. రాధిక తన గురించి తాను తెలుసుకునే సమయానికి కోటిన్నర రూపాయల అప్పు మిగిలింది. సంపాదించినది అంతా పోయింది. తన భవిష్యత్తు, కూతురు భవిష్యత్తును తలచుకుని కన్నీరు మున్నీరు అయింది. తన ఆస్థి అంతా పోగా ఒక్క ఇల్లు మాత్రమే మిగిలింది. అప్పుడుగాని తనకు అర్ధం అయింది మనుషుల గురించి.. డబ్బు ఉన్నపుడు చుట్టూ తియ్యని మాటలతో చేరతారు.. అదే డబ్బు పోయాక కనుమరుగవుతారు అని.

అయితే రాధిక కు ఆత్మాభిమాని ఎక్కువే అని చెప్పాలి. డబ్బులు పోయిన, అప్పులు కళ్ల ముందు మెదులుతున్న గాని దేహి అని ఎవరిని అడగలేదు. బ్యాంకు బ్యాలన్స్ లేదు, చేతిలో చిల్లి గవ్వ లేదు.. ఏమి చేయాలో తోచని పరిస్థితులలో ఇల్లు ఒక్కటి కనిపించింది. అందుకనే 1993 -94 మధ్య కాలంలో మిగిలిన ఆ ఒక్క ఇంటిని తాకట్టు పెట్టి అప్పులు తీర్చాలి అనుకుంది. ఆ రోజు ఆదివారం.. ఇల్లు కొనుగోలు చేసుకోవడానికి బయ్యర్లు వచ్చి పోతున్నారు. అదే సమయంలో తనకి సన్నిహితుడు అయిన నంద కుమార్ తన ఇంటికి వచ్చాడు. అయితే ఆయన స్వతహాగా నటుడు, జ్యోతిష్యుడు.. అయితే ఆయన రాధికను ఇల్లు అమ్మవద్దు.. నీకు రాబోయే కాలంలో మంచి భవిష్యత్తు ఉంది అని చెప్పాడు. కానీ రాధిక ఆ మాటలు నమ్మలేదు. ఇల్లు అమ్మకపోతే అప్పులు ఎలా తీర్చాలి అని నంద కుమార్ ను అడిగింది. అప్పుడు రాధిక దృష్టి బుల్లితెరపై పడింది. కష్టం వచ్చింది కదా అని ఇల్లు అమ్మడమా.. లేక కష్టాలను దాటి ముందుకువెళ్ళే ప్రయత్నం చేయాలా అని ముందుకు అడుగులు వేసింది. అలా ఒక సీరియల్ స్క్రిప్ట్ తో ముందుకు సాగింది. ఒకవేళ ఆ ప్రయత్నం కూడా విఫలం అయితే ఉన్న ఆ ఒక్క ఇల్లు కూడా పోయి నడి రోడ్డున పడ్డ ప్రమాదం ఉంది అని సన్నిహితులు హెచ్చరించిన గాని తన మీద తనకు ఉన్న నమ్మకంతో ముందుకు అడుగువేసినది. అలా తన తండ్రి రాధా నాయుడు, కూతురు రేయాన్ పేరుతో కలిపి “రాడాన్” అనే ఒక టెలివిజన్ సంస్థను స్థాపించి సీరియల్స్ తో ముందుకు సాగింది. ఇంకా బుల్లితెరపై రాధిక హవా మొదలైపోయింది. బుల్లితెరపై విజయం సాధించింది. ఇంకా సీరియల్స్ మీద సీరియల్స్ చేస్తూ బాగా బిజీ అయిపోయింది. కేవలం ఒక్క భాషలోనే కాకుండా చాలా భాషల్లో సీరియల్స్ తీస్తుంది. అలాగే పెద్ద పెద్ద నిర్మాతలు సైతం రాధికను చూసి నివ్వెరపోయారు.

అలానే ఏక్తాకపూర్ వంటి నిర్మాతలు కూడా రాధిక టెలివిజన్ రంగం పై దృష్టి పెట్టారు. అయితే అందరికన్నా విజయాన్ని ముందు చూసిన ఘనత ఒక్క రాధిక కి మాత్రమే సొంతం అయింది. దక్షిణాది భాషలన్నీ అయిపోగా, గుజరాతీ భాషల్లో కూడా సీరియల్స్ నిర్మిస్తోంది రాడాన్ సంస్థ. తెలుగులో రెండు సినిమాలు తమిళంలో ఆరు సినిమాలు కూడా తీశారు. త్వరలోనే హిందీలో కూడా అడుగుపెట్టబోతోంది. అలాగే ఇతర దేశాలైన శ్రీలంక, అమెరికా వంటి దేశాల్లో కూడా పలు భాషల్లో అలరించబోతోంది రాడాన్ సంస్థ. ఈ సంస్థ స్థాపించిన నాలుగేళ్లలోనే ఒక కార్పొరేట్ సంస్థగా మారిపోయింది అంటే 1999 లోనే ఒక కార్పొరేట్ సంస్థ గా వ్యవహరిస్తోంది. ఇప్పుడు రాడాన్ సంస్థ 300 కోట్ల ఆదాయాన్ని రాబడుతుంది. అంటే అందులో రాధిక కష్టం ఎంత ఉందో అన్న విషయం అర్థమైపోతుంది. రెండు పెళ్ళిళ్ళతో పూర్తిగా అప్పులపాలై పోయి మళ్లీ విజయాన్ని అందుకున్న ఏకైక నటి రాధిక అని చెప్పడంలో అతిశయోక్తి లేదు,

1995 సంవత్సరంలో ప్రేమకథా చిత్రం సినిమా షూటింగ్ జరుగుతున్న సమయంలో శరత్ కుమార్, రాధికను నన్ను పెళ్లి చేసుకుంటావా అని ప్రపోజ్ చేయగా అందుకు నిరాకరించింది. మొదట తాను తీసుకున్న రెండు పెళ్ళిళ్ళ విషయంలో తాను తీసుకున్న తప్పుడు నిర్ణయం గుర్తొచ్చింది. ఈసారి ఏదైనా కానీ తన తల్లి నిర్ణయానికే వదిలేస్తున్నాను అని శరత్ కుమార్ తో చెప్పింది. అలా శరత్ కుమార్ రాధిక తల్లిని ఒప్పించి రాధిక ని పెళ్లి చేసుకున్నాడు. వీరిద్దరికీ ఒక బాబు కూడా ఉన్నాడు ఇవన్నీ చూసిన తర్వాత రాధిక మూడు పెళ్లిళ్ల విషయంలో ఎంత కష్టం ఉంది అన్న విషయం ఎవరికైనా అర్థం అవుతుంది. అందుకని పొరపాటున కూడా ఒకరి విషయంలో తొందరపడి ఏలాంటి అభిప్రాయాలకు రాకూడదని రాధిక జీవితమే ఒక సాక్ష్యం. అయితే రాధిక ఇప్పుడు సీరియల్స్ తో పాటుగా, కొన్ని సినిమాల్లో క్యారెక్టర్ ఆర్టిస్ట్ గా కూడా నటిస్తుంది.