వీడియో వైరల్: కూలిన వంతెనను దాటుతూ సాహసం చేస్తున్న ప్రజలు.. కాలు జారితే అంతే సంగతులు!

ప్రస్తుతం వర్షాకాలం కావడంతో ఉత్తరాఖండ్, హిమాచల్ ప్రదేశ్‌లో భారీ వర్షాలు కురుస్తున్నాయి. ఈ క్రమంలోనే నదులు పొంగిపొర్లడంతో ప్రజలు ఎన్నో కష్టాలను ఎదుర్కొంటున్నారు. తాజాగా ఉత్తరాఖండ్ డెహ్రాడూన్ లో కురిసిన అధిక వర్షాల కారణంగా నదులు ఉప్పొంగి ప్రవహించాయి. ఈ నీటి వేగానికి పలు వంతెనలు కూడా కొట్టుకుపోయాయి . ఈ క్రమంలోనే స్థానికులు వర్ష ప్రభావానికి కొట్టుకుపోయిన వంతెనపై అమ్లావా నదిని దాటుతూ పెద్ద సాహసం చేస్తున్నారు. ప్రస్తుతం ఈ ఘటనకు సంబంధించిన వీడియో సోషల్ మీడియాలో చక్కర్లు కొడుతోంది.

అధిక వర్షాల కారణంగా నదీ ప్రవాహానికి ఒకవైపు ఒరిగిపోయిన ఆ వంతెనపై స్థానిక ప్రజలు వంతెన దాటుతూ పెద్ద సాహసం చేస్తున్నారు. పొరపాటున కూడా కాలు జారితే వారి ప్రాణాలు గాల్లో కలిసిపోతాయి. ఈ వీడియోలో ఇద్దరు మహిళలు, ముగ్గురు పురుషులు ఒకరి చేయి ఒకరు పట్టుకొని వంతెన దాటుతూ కనిపిస్తారు.

https://twitter.com/ANI/status/1414819555361185792

అవతల ఒడ్డున ఉన్న ఒక వ్యక్తి వారికి చేయి సహాయం అందించగా ఇలా ఒకరికొకరు చేతుల సహాయంతో వంతెన దాటే ప్రయత్నం చేశారు. ఈ క్రమంలోనే ఓ మహిళ భయంతో మధ్యలో చేయి వదిలేయగా ఓ వ్యక్తి ఆ మహిళని ఎంతో చాకచక్యంగా వంతెన దాటించారు. ఈ విధంగా మిగతా ఇద్దరినీ కూడా మరో ఇద్దరు వ్యక్తులు కలిసి వంతెన దాటించారు. ప్రస్తుతం ఈ ఘటనకు సంబంధించిన వీడియో సోషల్ మీడియాలో వైరల్ గా మారింది.