Night Curfew: కరోనా తగ్గినట్లే తగ్గి.. చాపకింద నీరులా విస్తరిస్తోంది. రోజురోజుకు కరోనా కేసులు పెరుగుతున్నాయే తప్ప తగ్గడం లేదు. దీంతో దేశంలోని కొన్ని రాష్ట్రాలు లాక్ డౌన్ దిశగా అడుగులు వేస్తుంటే.. మరికొన్ని రాష్ట్రాలు మాత్రం నైట్ కర్ఫ్యూని విధిస్తున్నాయి.

దీనిలో భాగంగానే మహారాష్ట్ర ప్రభుత్వం జనవరి 10 నుంచి రాత్రి 11 గంటల నుండి ఉదయం 5 గంటల నైట్ కర్ఫ్యూని విధిస్తున్నట్లు ప్రభుత్వం ప్రకటించింది. ఐదుగురు లేదా అంతకంటే ఎక్కువ మంది వ్యక్తులు సమూహాలుగా ఉంటే.. వారిపై కేసులు నమోదు చేస్తామని హెచ్చరించింది. ఉదయం వేళ 144 సెక్షన్ కొనసాగుతుందని స్పష్టం చేసింది.

స్విమ్మింగ్ పూల్స్, జిమ్‌లు, స్పాలు, బ్యూటీ సెలూన్‌లు, జూలు, మ్యూజియంలు , ఎంటర్‌టైన్‌మెంట్ పార్కులు మూసివేయబడతాయని పేర్కొన్నారు. హెయిర్ కటింగ్ సెలూన్‌లు , షాపింగ్ మాల్స్ , మార్కెట్ కాంప్లెక్స్‌లు 50 శాతం సామర్థ్యంతో పనిచేస్తాయని ప్రభుత్వం స్పష్టం చేసింది.

ఇంటి నుండి పనిని ఎంచుకోవాలని..

పార్కుల్లో సందర్శకుల సమాచారం కచ్చితంగా నమోదు చేసుకోవాలని తెలియజేశారు. ఇక రాష్ట్రంలో కొన్ని మినహాయింపులతో పాఠశాలలు, కళాశాలలు, కోచింగ్ ఇన్‌స్టిట్యూట్‌లు ఫిబ్రవరి 15 వరకు మూసివేయబడతాయని పేర్కొన్నారు. ఇక ఉదయం 5 గంటల నుంచి రాత్రి 10 గంటల వరకు 50 శాతం సీటింగ్ కెపాసిటీతో హోటళ్లు, రెస్టారెంట్లు, సినిమా హాళ్లు, ఆడిటోరియం వంటి వాటిని నడిపించుకోవచ్చని తెలిపారు. డబుల్ డోస్ తీసుకున్న వారిని మాత్రమే వాటిల్లోకి అనుమతించనున్నట్లు చెప్పింది. వ్యాక్సినేషన్ తీసుకున్న వారు మాత్రమే వారిని పబ్లిక్ ట్రాన్స్పోర్ట్లో మాత్రమే అనుమతించనున్నారు. ఇక మహారాష్ట్రలో గడిచిన 24 గంటల్లో 41,434 కొత్త కోవిడ్ కేసులు నమోదు కాగా.. 9,671 రికవరీలు, 13 మరణాలు నమోదయ్యాయి. రాష్ట్రంలో యాక్టివ్ కేసుల సంఖ్య 173,228 ఉండగా.. ఓమిక్రాన్ సంఖ్య 1,009కి పెరిగింది. ఇక ప్రభుత్వ కార్యాలయాలు ఇంటి నుండి పనిని ఎంచుకోవాలని .. ఆఫీసులో పని చేసే అవసరం ఉంటేనే డ్యూటీకి వెళ్లాలని పేర్కొన్నారు.