సినిమాల్లో మణిరత్నం చేసే మ్యాజిక్ గురించి ప్రత్యేకంగా చెప్పాల్సిన అవసరం లేదు. ఆయన సినిమాల్లో ఏదో తెలియని మాయ ఉంటుంది. అదే ప్రేక్షకులను కట్టిపడేస్తుంది. సినిమా ఇండస్ట్రీలో ఉన్న దర్శకుల్లో ఒకొక్కరిది ఒక్కో ప్రత్యేకత.. అయితే మణిరత్నం సినిమాలు మాత్రం అన్నీవర్గాల ప్రేక్షకుల మనసును కదిలిస్తాయి.

ఈ క్రమంలోనే ఆయన ‘నవరస’ సిరీస్‌‌‌ను ప్రేక్షకుల ముందుకు తీసుకువచ్చారు. తొమ్మిదిమంది దర్శకులతో, తొమ్మిదిమంది హీరోలతో ఈ వెబ్ సిరీస్‌‌‌‌‌‌‌ను నిర్మించారు. ఈ నవరస వెబ్ సిరీస్ నిన్నటి నుంచి అంటే ఆగస్టు 6 నుంచి ప్రముఖ ఓటీటీ ‘నెట్‌ఫ్లిక్స్‌’ వేదికగా స్ట్రీమింగ్‌ అవుతోంది .నవరసాలను జోడిస్తూ ఒక్కొక్క ఎపిసోడ్‌‌‌‌‌లో ఒక్కొక్క రసాన్ని చూపించారు.

దర్శకుడు జయేంద్రతో కలసి మణిరత్నం నవరసను నిర్మించారు. ఇటీవలే విడుదలైన ఈ సిరీస్ టీజర్, ట్రైలర్, పోస్టర్లు ప్రేక్షకుల్లో ఆసక్తిని రేకెత్తిచాయి. హాస్యం , శృంగారం, భయానకం , కరుణ , రౌద్రం , కోపం , ధైర్యం , అద్భుతం, బీభత్సం లాంటి మానవ జీవితంలోని నవరసాల ఎమోషన్స్‌‌‌‌తో ‘నవరస’ఆంథాలజీ సిరీస్ రూపొందిచారు. ఇంత వరకు బాగానే ఉంది. కానీ ఈ సిరీస్ లో 7 వ ఎపిసోడ్ ఇన్మై స్టోరీ పోస్టర్ ద్వారా పెద్ద వివాదం చెలరేగింది.

ఆ పోస్టర్ ను ముస్లింల పవిత్ర గ్రంథం ఖురాన్ ను అవమానించినట్లుగా ఉందని ముస్లిం పెద్దలు పేర్కొన్నారు. దీంతో సిరీస్ ను, సిరీస్ ను విడుదల చేసిన నెట్ ఫ్లిక్స్ లను బ్యాన్ చేయాలంటూ సోషల్ మీడియాలో డిమాండ్లు వస్తున్నాయి. కానీ దీనిపై డైరెక్టర్ మణిరత్నం, ఇటు నెట్ ఫ్లిక్స్ ఇంకా స్పందించలేదు.