Girl Child: రోజురోజుకు సమాజం ఎంతో అభివృద్ధి చెందుతూ పరుగులు తీస్తున్నా కొందరు మాత్రం పిల్లల పట్ల లింగ వివక్షత చూపుతున్నారు. ఈ క్రమంలోనే ఆడపిల్ల పుడితే బరువు అవుతుందని చదువుకోని వారు భావిస్తున్నప్పటికీ అమ్మాయి పుడితే రక్షణ కరువు అవుతుందని చదువుకున్నవారు కూడా ఆడపిల్లను పెంచి పెద్ద చేయాలంటే బరువుగా భావిస్తున్నారు.

ఈ క్రమంలోనే చాలామంది అమ్మాయి పుడుతుందని తెలియగానే వారిని కడుపులోనే చిదిమేస్తున్నారు. మరికొందరు చెత్తకుప్పల పాలు చేస్తున్నారు. అయితే ప్రజల్లో మార్పు రావడం కోసం వారి ఆలోచన ధోరణి మార్చడం కోసం తెలంగాణ వనపర్తి జిల్లా, పెద్దమందడి మండలం, మద్దిగట్లకు చెందిన యువకులు సరికొత్త పథకానికి శ్రీకారం చుట్టారు.

ఈ క్రమంలోనే ఆ గ్రామంలో నివసించే కొంతమంది యువకులు ఒక గ్రూపుగా ఏర్పడి ఆడపిల్లల పట్ల చూపిస్తున్న వివక్షతను ప్రతి ఒక్కరిలో తొలగించడం కోసం సరికొత్త ఆలోచన చేశారు. ఈ క్రమంలోనే ఆ గ్రామంలో ఎవరికైతే ఆడపిల్ల పుడుతుందో వారికి ఈ యువకులు ఏకంగా రూ.11,116 డబ్బులను అందజేస్తున్నారు.

అభయ హస్తం పేరుతో సహాయం..

ఇలా ఈ గ్రామంలోని యువకులు ఇప్పటికే 19 మంది ఆడపిల్లలకు 2,11204 రూపాయలు డబ్బు అందజేశామని ఈ పథకానికి అభయహస్తం అనే పేరును పెట్టినట్లు తెలియజేశారు. ఈ క్రమంలోనే ఈ గ్రామంలోని యువకులు కమిటీగా ఏర్పడి డబ్బును పోగు చేయడం కోసం ఏర్పాట్లు చేయగా వీరు చేస్తున్న మంచి పని అభినందిస్తూ కొందరు దాతలు వీరికి సహాయం చేస్తున్నారు.ఏది ఏమైనా ఆడపిల్లల సంరక్షణ కోసం ఈ గ్రామంలో యువకులు చేస్తున్న ఈ పని పై పలువురి ప్రశంసలు కురిపిస్తున్నారు.