‘న్యాయంకావాలి’ చిత్రంతో ప్రారంభమైన చిరంజీవి కోదండరామిరెడ్డి కాంబినేషన్ అప్రతిహతంగా ఒక దశాబ్దం పాటు కొనసాగింది. మొదటి చిత్రంతోనే హిట్ అందుకున్న ఈ కాంబినేషన్ దాదాపు హండ్రెడ్ పర్సెంట్ సక్సెస్ తో ముందుకు వెళ్లారు.
న్యాయం కావాలి, అభిలాష, చాలెంజ్, దొంగమొగుడు, రాక్షసుడు, పసివాడి ప్రాణం లాంటి బ్లాక్ బస్టర్స్ వీరి ఖాతాలో నమోదయ్యాయి. పరుచూరి బ్రదర్స్ అందించిన అద్భుతమైన కథకు కోదండరామిరెడ్డి తనదైన శైలిలో ఈ సినిమాను ముందుకు నడిపించారు.
1990 విజయలక్ష్మి ఆర్ట్ ప్రొడక్షన్స్, టి.త్రివిక్రమరావు నిర్మాణం, కోదండరామిరెడ్డి దర్శకత్వంలో “కొండవీటిదొంగ” చిత్రం విడుదల అయ్యింది. ఈ సినిమాలో చిరంజీవి, విజయశాంతి, రాధ హీరో హీరోయిన్లుగా నటించారు. ఉన్నత విద్యనభ్యసించిన హీరో ప్రజల కోసం ప్రభుత్వ ఉద్యోగం సైతం పక్కనపెట్టి పీడిత ప్రజల అభ్యున్నతికి పోరాడే కథాంశంతో ఈ సినిమా రూపొందించబడింది. ఇళయరాజా అందించిన “శుభలేఖ రాసుకున్నా ఎదలో ఎపుడో అదినీకు పంపుకున్న అపుడే కళలో” లాంటి గీతాలు ఆనాడు సూపర్ డూపర్ హిట్ అయ్యాయి. ఈ సినిమా బాక్సాఫీస్ వద్ద విజయవంతంగా ప్రదర్శింపబడింది….
ఇకపోతే చక్కని అందం, అభినయం గల సుమన్.. కోడి రామకృష్ణ దర్శకత్వంలో వచ్చిన “తరంగిణి” చిత్రంలో హీరోగా సినీరంగ ప్రవేశం చేశారు. ఆ తర్వాత ఇద్దరుకిలాడీలు, సితార, మెరుపుదాడి, కంచుకవచం 20వ శతాబ్దం, చిన్నల్లుడు, బావ బావమరిది వంటి హిట్ చిత్రాల్లో ఆయన నటించారు. 1990 శ్రీ గౌతమ్ చిత్ర బ్యానర్, సి.హెచ్.రెడ్డి నిర్మాణం, సత్యారెడ్డి దర్శకత్వంలో ‘కొండవీటిరౌడీ’ చిత్రం విడుదలయింది. ఈ చిత్రంలో సుమన్, వాణి విశ్వనాథ్, అశ్విని హీరో, హీరోయిన్లుగా నటించారు. రాజ్ కోటి అందించిన గీతాలు ప్రేక్షకులను ఆకట్టుకోలేక పోయాయి. సంక్రాంతి కానుకగా వచ్చిన ఈ సినిమా బాక్సాఫీస్ వద్ద పరాజయం మూటగట్టుకుంది.