సాధారణం గా పెళ్లి కానీ అమ్మాయిల ప్రకటనలను వారికి సంబంధించిన బయోడేటాను సంబంధిత కులానికి చెందిన మ్యాట్రిమోనీలో ప్రకటిస్తూ వివాహ సంబంధాలను వెతకడం మనం చూస్తుంటాము. అయితే మీరెప్పుడైనా మ్యాట్రిమోనీలో భర్త ఉండగానే భార్యకు వివాహ ప్రకటన చేయడం విన్నారా.. ఆ ప్రకటన కూడా భర్త చేయడం విశేషం. వినడానికి ఆశ్చర్యంగా ఉన్న ఈ వింత ఘటన తమిళనాడులో చోటు చేసుకుంది. పూర్తి వివరాల్లోకి వెళితే….

తిరువళ్లూరు జిల్లా కడంబత్తూరు యూనియన్‌కి చెందిన ఓ యువతి ఓంకుమార్‌ అనే యువకుడిని పెళ్లి చేసుకుంది. 2016 సంవత్సరంలో పెద్దల సమక్షంలో వీరి పెళ్లి ఎంతో అంగరంగ వైభవంగా జరిగింది. ప్రస్తుతం వీరికి నాలుగు సంవత్సరాల కుమారుడు ఉన్నారు. ఇన్ని రోజులు ఎంతో ఆనందంగా సాగిన వీరి సంసారంలో మనస్పర్థలు చోటు చేసుకున్నాయి.

ఇలా భార్య భర్తల మధ్య గొడవలు చోటు చేసుకోవడంతో ఆ గొడవలను సర్దిచెప్పే ప్రయత్నం కుటుంబ సభ్యులు చేసినప్పటికీ వినకపోవడంతో విడాకులు తీసుకోవాలని కోర్టును ఆశ్రయించారు. అయితే ప్రస్తుతం వీరి విడాకులు కోర్టులో పరిశీలనలో ఉండగానే ఓంకార్ తన నీచ బుద్ధిని బయటపెట్టారు.

తన భార్యకు సంబంధించిన బయోడేటాను మ్యాట్రిమోనీ వెబ్సైట్ లో అప్లోడ్ చేసి వరుడు కావలెను అంటూ తన తండ్రి ఫోన్ నెంబర్ పెట్టారు.ఈ క్రమంలోనే ఆ యువతి డీటెయిల్స్ చూసిన కొందరు వ్యక్తులు తమ కూతురిని పెళ్లి చేసుకోవడానికి ఎలాంటి అభ్యంతరం లేదంటూ తన తండ్రికి ఫోన్లు చేస్తున్నారు. ఇలా తన కూతురు గురించి తనని పెళ్లి చేసుకుంటామని ఫోన్ కాల్స్ రావడంతో ఎంతో ఆశ్చర్యానికి గురైన తన కుటుంబ సభ్యులు సైబర్క్రైమ్ పోలీసులకు ఫిర్యాదు చేశారు. ఈ క్రమంలోనే పోలీసులు అసలు నిజం బయట పెట్టడంతో పాటు ఓంకార్ ను అదుపులోకి తీసుకున్నారు.