Dog: కొంతమందికి ఇంట్లో కుక్క పిల్లలను పెంచుకోవడం అంటే ఎంతో ఇష్టం. వాటిని ఇంట్లో మనిషిని ఎలా అయితే ట్రీట్ చేస్తారో అంత కంటే ఎక్కువ ప్రేమను చూపిస్తుంటారు. వాటికి ఏమైనా బాధ కలిగితే చెప్పడానికి నోరు ఉండదు.. కానీ వాటి హావభావాల ద్వారా కొంతమంది అర్థం చేసుంటారు.

ఇక కుక్కకి మనిషికి కూడా లేనంత విశ్వాసం ఉంటుంది అని అంటుంటాం. ఒక్కసారి ఏ కుక్కకైనా అన్నం పెడితే అది చాలా రోజుల వరకు గుర్తు పెట్టుకుంటుందట. ఇక ఇక్కడ జరిగిన ఘటన కుక్క పిల్ల కోసం చోటుచేసుకుంది. ఈ ఘర్షణలో ముగ్గురు గాయపడ్డారు. పూర్తి వివరాల్లోకి వెళ్తే..

అనంతపురం జిల్లా పెనుకొండ మండలం మంగాపురంలో రైతు అమరనాథరెడ్డి తన పొలంలోని షెడ్‌ వద్ద ఆదివారం ఉదయం ఓ కుక్క పిల్లను కట్టి ఉంచాడు. దానిని ప్రతీ రోజు ఇంటి నుంచి పొలానికి తీసుకెళ్తుండేవాడు. దానిని పొలంలోకి కోతులు మరియు మరేదైనా జంతువులు రాకుండా కాపలాగా ఉపయోగించుకునే వాడు.

బాధితుల ఫిర్యాదు మేరకు..

అయితే ఆ కుక్కపిల్లపై అదే గ్రామానికి చెందిన శబరీష్ అనే యువకుడు మోజు పడ్డాడు. ఆ కుక్కపిల్లను కట్టేసింది చూసి.. అక్కడ నుంచి దానిని ఎత్తుకెళ్లాడు. కాసేపటి తర్వాత ఈ విషయం తెలుసుకున్న అమరనాథరెడ్డి.. వెంటనే శబరీష్‌ను మందలించాడు. ఇలా అనుమతి లేకుండా ఎలా తీసుకెళ్తావ్ అంటూ ఇద్దరి మధ్య గొడవ తారా స్థాయికి చేరింది.మాట మాట పెరిగింది. ఒకరినొకరు నెట్టుకుంటూ.. కొట్టుకున్నారు కూడా. అంతే కాకుండా ఈ గొడవ అక్కడితో ఆగలేదు. శబరీష్‌ ఇంటికి వెళ్లి తన సోదరుడు మంజునాథరెడ్డికి విషయం తెలిపి.. అమరనాథరెడ్డి వద్దకు పిలుచుకొని వెళ్లాడు. మళ్లీ పరస్పరం దాడులు చేసుకున్నారు. ఇలా అక్కడ ఉన్న ముగ్గురికి తీవ్ర గాయాలు అయ్యాయి. పోలీసులకు విషయం తెలియడంతో ఒకరిపై ఒకరు కేసులు పెట్టుకున్నారు. ఇలా బాధితుల ఫిర్యాదు మేరకు పోలీసులు కేసు నమోదు చేసుకొని దర్యాప్తు చేపట్టడం ప్రారంభించారు.