‘మీలో ఎవరు కోటీశ్వరులు’ అనే ప్రోగ్రాంకు నాగార్జున హోస్ట్ చేసిన విషయం తెలిసిందే. అప్పుడు ఈ ప్రోగ్రాంకు విపరీతమైన రేటింగ్ వచ్చింది. ఎంతో పాపులారిటీ కూడా తెచ్చుకుంది. ఎంతో మంది అందులో పాల్గొని నగదు బహుమతిని గెలుచుకున్నారు. దీనిలో 15 ప్రశ్నలను అడుగుతారు. ప్రతీ 5 ప్రశ్నలకు ఒకసారి సేఫ్ జోన్ కి వెళ్తారు.

ఇలా 15 ప్రశ్నలు చెప్పిన వాళ్లు రూ. కోటి గెలుచుకుంటారు. అయితే రెండో సీజన్ ఈ ప్రోగ్రాంను మెగస్టార్ చిరంజీవి హోస్ట్ చేశారు. మూడో సీజన్ కు జూనియర్ ఎన్టీఆర్ హోస్ట్ చేస్తున్నారు. కానీ ఈ సారి ఆ పేరును ‘ఎవరు మీలో కోటీశ్వరులు’గా మార్చేశాడు. అయితే ఇటీవల ఓ ప్రోమో రిలీజ్ చేశారు. అందులో ఒకరు కోటి రూపాయలు గెలుచుకున్నట్లుగా తెలిపారు.

అది ఎవరికి వరించిందో తెలుసా.. భద్రాద్రి కొత్తగూడెం జిల్లాకు చెందిన వ్యక్తిని అదృష్టం వరించింది. సుజాతనగర్‌ మండలానికి చెందిన బి.రాజారవీంద్ర కోటి రూపాయలు గెలుచుకున్నట్లు తెలుస్తోంది. రిటైర్డ్‌ బ్యాంకు ఉద్యోగి బీవీఎస్‌ఎస్‌ రాజు–శేషుకుమారి దంపతుల కుమారుడు రాజారవీంద్ర డీజీపీ క్యాంపు కార్యాలయంలో ఎస్సైగా ప్రస్తుతం విధులు నిర్వర్తిస్తున్నారు.

ఒకటో ప్రశ్న నుంచి 14 ప్రశ్నల వరకు సమాధానం చెప్పిన తర్వాత రూ.50లక్షలతో అతడు ఉన్నాడు. ఇక ఎన్టీఆర్ నోటి వెంట రూ.కోటి ప్రశ్న అంటూ మొదటి సారి వచ్చింది. అతడు ఆ ప్రశ్నకు జవాబు చెప్పినట్లు తెలుస్తోంది. రవీంద్ర మాట్లాడిన ప్రోమో సోషల్‌ మీడియాలో వైరల్‌గా మారింది. ఈ ఎపిసోడ్ త్వరలో ప్రసారం కానుంది.