దేశీయ బీమా దిగ్గజం లైఫ్ ఇన్సూరెన్స్ కార్పొరేషన్ ఆఫ్ ఇండియా ఎప్పటికప్పుడు కొత్త పాలసీలను అందుబాటులోకి తెస్తూ వినియోగదారులను ఆకట్టుకుంటున్న సంగతి తెలిసిందే. ఎల్ఐసీ తాజాగా మరో కొత్త పాలసీని వినియోగదారుల కోసం అందుబాటులోకి తెచ్చింది. జీవన్ శాంతి పేరుతో ఎల్ఐసీ నూతన పాలసీని ఆవిష్కరించింది. జీవన్ శాంతి పాలసీ డిఫర్డ్ యాన్యుటీ ప్లాన్. ఇది ఇండివిజువల్ సింగిల్ ప్రీమియం ప్లాన్ కావడం గమనార్హం.

యాన్యుటీ రేట్లను జీవన్ శాంతి పాలసీని తీసుకునే సమయంలోనే నిర్ణయించుకోవచ్చు. ఈ పాలసీ ఎంపిక చేసుకున్న ఆప్షన్ ప్రకారం పాలసీ డబ్బులు వస్తాయి. మనం పాలసీ తీసుకున్న తరువాత ఎన్ని సంవత్సరాల నుంచి డబ్బులను పొందాలో ముందుగానే నిర్ణయించుకోవచ్చు. ఆన్ లైన్ తో పాటు ఆఫ్ లైన్ లో కూడా పాలసీని కొనుగోలు చేసే అవకాశం ఉంటుంది. ఆసక్తి ఉన్నవాళ్లు ఆన్ లైన్ లోనే పాలసీలను కొనుగోలు చేయవచ్చు.

జాయింట్ లైఫ్ యాన్యుటీ ఆప్షన్, సింగిల్ లైఫ్ యాన్యుటీ ఆప్షన్ లతో ఈ పాలసీ అందుబాటులో ఉంటుంది. ఈ రెండింటిలో ఒక ఆప్షన్ ను ఎంపిక చేసుకుని మనం సులువుగా డబ్బు పొందవచ్చు. పాలసీ తీసుకున్న తరువాత ఏ కారణం చేతనైనా పాలసీదారుడు మరణిస్తే నామినీ డెత్ బెనిఫిట్స్ పొందే అవకాశాలు ఉంటాయి. కనీసం లక్షన్నర రూపాయలతో ఈ పాలసీని తీసుకోవాల్సి ఉంటుంది.

30 సంవత్సరాల నుంచి 79 సంవత్సరాల మధ్య వయస్సు ఉన్నవాళ్లు ఈ పాలసీకి అర్హులు. నెల, 3 నెలలు, ఆరు నెలలు, 12 నెలల చొప్పున యాన్యుటీని పొందే అవకాశం ఉంటుంది. 5.5 శాతం రాబడితో ఈ పాలసీని ఎంచుకోవచ్చు. ఎవరైనా 5 లక్షల రూపాయల కంటే ఎక్కువ మొత్తానికి పాలసీని తీసుకుంటే యాన్యుటీ రేటు పెరుగుతుంది. సంవత్సరానికి కనీసం 12,000 రూపాయలు యాన్యుటీ లభించే ఈ పాలసీ వల్ల ఎన్నో ప్రయోజనాలు ఉన్నాయి.