సీతాకోకచిలుక వంటి సూపర్ హిట్ సినిమాలో నటించి ఎంతో మంది తెలుగు అభిమానులకు సొంతం చేసుకున్న తమిళ నటుడు కార్తీక్ గురించి ప్రత్యేకంగా చెప్పాల్సిన పనిలేదు. తాజాగా ఈ హీరో ఒక ప్రమాదానికి గురైనట్లు తెలుస్తోంది. ఈ ప్రమాదంలో తీవ్రంగా గాయపడిన కార్తీక్ ను ఒక ప్రైవేట్ ఆస్పత్రిలో చేర్పించి చికిత్స అందిస్తున్నట్లు తెలిపారు.
నటుడు కార్తీక్ వ్యాయామం చేస్తూ.. ప్రమాదవశాత్తు కింద పడటంతో తలకు, మెడకు తీవ్ర గాయాలైనట్లు తెలుస్తోంది.ఈ క్రమంలోనే అతనిని ఒక ప్రైవేట్ ఆస్పత్రికి చేర్పించి చికిత్స అందించడంతో అతని పరిస్థితి కొద్దిగా మెరుగ్గా ఉన్నట్లు వైద్యులు సూచించారు. ఇకపోతే నటుడు కార్తీక్ గత కొంత కాలం నుంచి శ్వాసకోస, బీపీ వంటి వ్యాధులతో సతమతమవుతున్నట్లు తెలిపారు.
సీతాకోకచిలుక ద్వారా తెలుగులోకి ఎంట్రీ ఇచ్చిన కార్తీక్ ఆ తరువాత అభినందన, అన్వేషణ, అనుబంధం, గోపాలరావు గారి అబ్బాయి వంటి ఎన్నో సినిమాలలో నటించి విశేష ప్రేక్షకాదరణ సంపాదించుకున్నారు. పలు సినిమాలలో నటిస్తూనే మరోవైపు రాజకీయాలలోకి రావాలనే ఆశతో సొంతంగా పార్టీని కూడా స్థాపించాడు. అయితే అనారోగ్య సమస్యల కారణంగా పార్టీని వదులుకున్నారు.
ఇకపోతే నటుడు కార్తీక్ వారసుడిగా గౌతమ్ కార్తీక్ హీరో గా మణిరత్నం దర్శకత్వం వహించిన “కడలి” సినిమా ద్వారా ఎంట్రీ ఇచ్చారు. అయితే ఈ సినిమా ఆశించిన మేర ఫలితాలను ఇవ్వలేకపోయింది. ప్రస్తుతం హాస్పిటల్ లో చికిత్స పొందుతున్న కార్తీక్ ఆరోగ్య పరిస్థితి అదుపులోనే ఉందని డాక్టర్లు వెల్లడించడంతో అభిమానులు కాస్త ఊపిరి పీల్చుకున్నారు.