మన సమాజం రోజురోజుకి ఎంతో అభివృద్ధి చెందుతున్నప్పటికీ కొందరు మాత్రం ఎంతో అజ్ఞానంతో ప్రవర్తిస్తున్నారు. ఇప్పటికీ అమ్మాయిల పట్ల కొన్ని చోట్ల వివక్షత చూపుతూనే ఉన్నారు. అమ్మాయిలు కేవలం ఇంటి పని, వంట పనికి మాత్రమే పరిమితమని భావిస్తున్నారు. అయితే ఈ అజ్ఞానం నుంచి బయటకు రావాలని కేంద్ర మహిళా శిశు సంక్షేమ శాఖ మంత్రి స్మృతి ఇరానీ మంగళవారం ఇన్స్టాగ్రామ్ వేదికగా ఒక వీడియోను షేర్ చేశారు.

ప్రస్తుతం ఈ వీడియో సోషల్ మీడియాలో వైరల్ గా మారి ఎంతోమంది నెటిజన్లను ఆకట్టుకుంది. యానిమేటెడ్‌ వీడియోలు, జీఐఎఫ్‌లతో కథలు చెప్పే బోహ్రా సిస్టర్స్‌కు సంబంధించిన వీడియోను మంత్రి షేర్ చేశారు. ఈ వీడియో చూసిన ప్రతి ఒక్కరు తమ కూతురి పట్ల ఉన్న అవగాహనను మార్చుకోవాలని మంత్రి సూచించారు.

https://www.instagram.com/p/CQ-6weqnisZ/?utm_source=ig_web_copy_link

ఈ వీడియోలో ఒక అమ్మాయి ఏడుస్తూ చిరిగిన దుస్తులు ధరించి చేతిలో చీపురు పట్టుకొని ఉంటుంది. అయితే ఆ అమ్మాయికి చిరిగిన దుస్తులకు బదులుగా స్కూల్ యూనిఫామ్ ధరించగానే… ఆమె ముఖంలో ఆనందం ఉట్టిపడుతుంది.”మీ కుమార్తెలను ఎదగడానికి రెక్కలు ఇవ్వండి”అనే క్యాప్షన్ తో మంత్రి స్మృతి ఇరానీ షేర్ చేసిన ఈ వీడియోను చూసిన నెటిజన్లు తమదైన శైలిలో కామెంట్లు చేస్తున్నారు. దీనిపై స్పందించిన ఓ నెటిజన్ ఇది చాలా మంచి సందేశం అని కామెంట్ చేయగా మరొక నెటిజన్ ఇది ఎంతో బాగుంది తక్షణమే మీ కూతుళ్లను కూడా బడిబాట పట్టించండి అంటూ తనదైన శైలిలో కామెంట్లు చేశారు.