కోటి కాంతులతో విరాజిల్లేది ఆ కోదండరాముడు అయితే లక్షల విలువచేసే అక్షరాలను లిఖించేది ఈ అనంత శ్రీరాముడు. సందర్భోచితంగా పాత్రలోకి పరకాయ ప్రవేశం చేసి వారి మాటలనే తన పాటలుగా చేసి సందర్భాన్ని, సంగతిని ప్రేక్షకుడి కళ్ళకు కట్టినట్టుగా వినసొంపుగా తన పాటలహరిలో పరవశింప చేస్తాడు.

ప్రేమ పాటలను అనంత శ్రీరామ్ అలవోకగా ప్రేక్షకుడి మనసుకు తాకేలా తన కలాన్ని కదుపుతాడు. ప్రేమికుల్లో ప్రేమికుడు అవుతాడు.వారి సరససల్లాపాలను సరిగమలతో చుట్టేస్తాడు. వారి విరహాన్ని విసుక్కుంటాడు. వారి విహారానికి పక్షి లాంటి రెక్కలు తొడుగుతాడు. ప్రేమికుల యెదలో చేరి అన్నీచేస్తూ ఉంటాడు. ఆ వయసులో ఒక్కో క్షణం ఒక్కో వసంతం అని పలుకుతాడు. ప్రేమికుల మనసులో ఊహా ప్రపంచాన్ని నిర్మిస్తాడు. వారిని ఆనందడోలికల్లో ఊగిస్తాడు.

ఇలాంటి అందమైన అనుభూతి గల పాటలను రాసే అనంత శ్రీరామ్ కి ఒక సందర్భంలో బాహుబలి లోని ఒక పాట రాయడానికి ఆ సినిమా దర్శకుడు రాజమౌళి శ్రీరామ్ ని సంప్రదించాడు. అప్పుడు బాహుబలి లో తమన్నా మాహిష్మతి సామ్రాజ్య తిరుగుబాటు యోధురాలు అదేవిధంగా కథానాయకుడు ప్రభాస్ ఓ గిరిజన తెగలో పెరుగుతున్న యోధుడు. వీరి మధ్య ఏ భాష సరళిని వాడాలి గ్రామ్యమా గ్రాంథికమమా.? అన్నది ఒక అంశం.

ప్రభాస్ తమన్నా లు అన్యోన్యంగా ఉండేటప్పుడు ప్రభాస్ తమన్నాకు వేసిన పచ్చబొట్టు వారి కౌగిలింతలో కలిసేచోటా బావగర్భిత పాట రాయాలని రాజమౌళి చెప్పగా.. అనంత శ్రీరామ్ కి మరింత సమయం కావాల్సి వచ్చింది. అలా పచ్చబొట్టేసిన.. పిల్లగాడా అనే పాట రాయడానికి అనంత శ్రీరామ్ దాదాపు 70 రోజుల సమయం తీసుకోవడం జరిగింది. బాహుబలి సినిమాలో అలాంటి పాట ప్రేక్షకులను ఎంతగానో అలరించింది.