సాధారణంగా కొంతమందికి చలికాలంలో చలి తీవ్రత ఎక్కువగా ఉండటం వల్ల తరచు తుమ్ములు వస్తూ ఉంటాయి. ఈ విధంగా తుమ్ములు రావడం వల్ల ఎంతో చికాకుగా, ఇబ్బందిగా ఉంటుంది. తుమ్ములు తగ్గడానికి ఏవేవో ప్రయత్నాలు చేస్తున్నప్పటికీ ఎలాంటి ఫలితం ఉండదు. మరికొంతమందికి వాతావరణంతో సంబంధం లేకుండా ఎక్కువగా తుమ్ములు వస్తుంటాయి. ఈ విధంగా అధికంగా తుమ్ముల సమస్యతో బాధపడేవారు తొందరగా తుమ్ములు తగ్గాలంటే ఈ సులభమైన చిట్కాలను పాటించడం ద్వారా తుమ్ముల నుంచి విముక్తి పొందవచ్చు.

వాతావరణంలో మార్పులు లేదా కాలుష్యం కారణంగా తరచూ తుమ్ములు వచ్చే వారు డాక్టర్ ను సంప్రదించి ఎన్నో మందులు వాడుతున్నప్పటికీ కొందరిలో ఎలాంటి ప్రయోజనం ఉండదు. అలాంటి సమయంలో మన వంటిల్లు నుంచి ఈ సమస్యకు ఔషధాన్ని తయారు చేసుకోవచ్చు. మన వంటింట్లో దొరికే మసాలా దినుసులు వల్ల తరుచూ వచ్చే తుమ్మల నుంచి పూర్తిగా విముక్తి పొందవచ్చు.

మన ఇంటిలో దొరికే కొద్దిగా మెంతులు, వాము, మిరియాలు వీటన్నింటిని విడివిడిగా వేయించి పక్కన పెట్టుకోవాలి. చల్లారిన తరువాత వీటిని బాగా పొడి చేసి విడివిడిగా నిల్వచేసుకోవాలి.పొడిగా చేసుకొని ఉన్న ఈ దినుసులను ఒక్కొక్కటి 25 గ్రాముల చొప్పున కలిపి ఉంచుకోవాలి. ప్రతిరోజు ఉదయం ఒక తమలపాకులో ఒక గ్రాము చూర్ణం, అర టీ స్పూన్ తేనె కలిపి ఆకు మొత్తం చుట్టి, ఆ ఆకును నమిలి మింగాలి. ఈ విధంగా కొద్దిరోజుల పాటు చేయటం వల్ల తరచు తుమ్ములు రావడం తగ్గిపోవడమే కాకుండా శరీరంలో రోగ నిరోధక శక్తి కూడా మెరుగుపడుతుంది. మన శరీరంలో రోగనిరోధక శక్తి మెరుగుపడటం వల్ల మన శరీరంలో అలర్జీ తత్వం తగ్గి ఈ సమస్యకు చక్కటి పరిష్కారం లభిస్తుంది.