Latha Mangeshkar:ప్రముఖ గాయని లతా మంగేష్కర్ గురించి కొత్తగా పరిచయం చేయాల్సిన అవసరం లేదు. తన మధురమైన గాత్రంలో కేవలం భారతదేశం లోనే కాకుండా ప్రపంచ వ్యాప్తంగా కోట్లాది మంది సంగీతాభిమానుల హృదయాలు గెల్చుకున్నారు లతా మంగేష్కర్. కాగా ఈ నెల 8న కరోనా బారిన పడిన ఆమె ప్రస్తుతం ముంబయి బ్రీచ్ క్యాండి ఆస్పత్రిలో చికిత్స పొందుతున్నారు. ఆమె వయసు రీత్యా ఐసీయూలో ఉంచి ఆమెకు ప్రత్యేక వైద్యం అందిస్తున్నారు డాక్టర్లు. కాగా మంగేష్కర్ ఆస్పత్రిలో చేరినప్పటి నుంచి ఆమె త్వరగా కోలుకోవాలని ప్రముఖులు, అభిమానులు ప్రార్థిస్తున్నారు.
ఈ క్రమంలో ఆమె ఆరోగ్య పరిస్థితి మరింత క్షీణించిందంటూ నెట్టింట్లో వార్తలు చక్కర్లు కొట్టాయి. తాజాగా లతా మంగేష్కర్ ఆరోగ్య పరిస్థితిపై గురించి ఆమెను పరీక్షిస్తున్న డాక్టర్ ప్రతీత్ సమ్దానీ స్పందించారు. ప్రస్తుతం లతా మంగేష్కర్ ఆరోగ్య పరిస్థితి మెరుగుపడిందని… అయితే ఆమెను ఇంకా ఐసీయూలోనే ఉంచి పరిశీలిస్తున్నామని తెలిపారు. లతా మంగేష్కర్ ఆరోగ్యంపై వస్తున్న వదంతులను నమ్మవద్దని… ప్రస్తుతం ఆమె ఆరోగ్యం మెరుగుపడిందన్నారు. ఈ నేపథ్యంలో ఓ ఆటో డ్రైవర్ లతా మంగేష్కర్ కోసం చేసిన ఓ పనికి అందరూ అతన్ని ప్రశంసిస్తున్నారు.mu
లతా మంగేష్కర్ కోసం ఉన్నదంతా ఇచ్చేసిన ఆటో డ్రైవర్ సత్యవాన్…
ముంబయి పట్టణంలో నివసించే సత్యవాన్ గీతే లతా మంగేష్కర్‌కి పెద్ద అభిమాని. లతా మంగేష్కర్‌ను అతను సరస్వతి దేవి రూపంగా భావిస్తాడు. అందుకే తన జీవనాధారమైన ఆటోను కూడా గాయని బొమ్మలతోనే అందంగా అలంకరించాడు. తన ఆటోలో కూడా ఆమె ఆలపించిన పాటలనే వింటూ ఉంటాడు. కాగా లతా మంగేష్కర్ కరోనాతో ఆస్పత్రిలో చేరినప్పటి నుంచి ఆమె త్వరగా కోలుకోవాలని నిరంతరం ప్రార్థనలు చేస్తున్నాడు. ఈ క్రమంలోనే మంగేష్కర్ చికిత్స కోసం తన సంపాదనను ఆమె ఆరోగ్య ఖర్చుల కోసం దానం చేశాడు.