సినిమా ఇండస్ట్రీలో లక్ మాత్రమే ఫేవర్ చేస్తుందనేది ఎవరైనా ఒప్పుకొని తీరాల్సిందే. ముఖ్యంగా హీరోయిన్స్ విషయంలో దర్శక, నిర్మాతలు ఇది సెంటిమెంట్‌గా భావిస్తారు. ఒక సినిమా హిట్ అయితే ఇక ఆమె కాల్‌షీట్స్ కోసం ఎంతగా ఎగబడతారో ప్రత్యేకంగా చెప్పనవసరం లేదు. ప్రత్యేకంగా ఫ్లైట్ టికెట్ వేసుకొని మరీ ముందు వెనక ప్రాజెక్ట్స్ ఏమైనా కమిటయిందేమో చూసి, ఆ ప్రాజెక్ట్స్‌కి నిర్మాతలు ఎంత రెమ్యునరేషన్ ముట్టచెబుతున్నారో ఆరా తీసి దానికి రెట్టింపు ఇవ్వడానికి కూడా రెడీ అయిపోయి అడ్వాన్స్‌గా చేతిలో చెక్ పెట్టేస్తారు.

అదే ఒక హీరోయిన్ డెబ్యూ సినిమా ఫ్లాపయిందంటే మాత్రం ఆమె ఆఫీసుల చుట్టూ తిరిగినా పట్టించుకోరు. ఇక ఖర్మ కాలి రెండు మూడు భాషలలో చేసిన మొదటి సినిమా ఫ్లాప్  లిస్ట్‌లో చేరితే ఆమె ఇక పనికిరాని వస్తువుగా చూసే వారే ఎక్కువగా ఉంటారు. గతంలో ఒక హీరోయిన్‌ని అలానే సౌత్ సినిమా ఇండస్ట్రీలలోని మేకర్స్ చూసిన సందర్భాలున్నాయి. ఆ హీరోయిన్ మరెవరో కాదు యామీ గౌతమ్. ఈమె కెరీర్ ప్రారంభంలో ఎక్కువగా చేసిన సినిమాలన్నీ ఫ్లాప్స్ గానే మిగిలాయి. హీరోయిన్‌గా చేస్తూనే కమర్షియల్ యాడ్ ఫిలింస్ లో కూడా వెలుగుతోంది.

యామీ గౌతమ్ 2010లో కన్నడ సినిమాతో సినీ ఇండస్ట్రీకి పరిచయమైంది. ఆ తర్వాత 2011 లో పంజాబీ సినిమాలో నటించింది. ఇక 2011 లోనే టాలీవుడ్ సినీ ఇండస్ట్రీకి ‘నువ్విలా’ సినిమాతో పరిచయమైంది. టాలెంటెడ్ డైరెక్టర్ రవిబాబు ఈ సినిమాను తెరకెక్కించాడు. అయితే ఈ సినిమా ఫ్లాప్ గా మిగిలింది. తెలుగులో చేసిన డెబ్యూ సినిమా ఫ్లాప్ అంటే అంత త్వరగా నిర్మాతలు మళ్ళీ అవకాశం ఇవ్వరు. దాంతో పంజాబీ, హిందీ, మలయాళ, తమిళ సినిమాలో అవకాశాలు అందుకుంటూ హీరోయిన్ గా నిలదొక్కునే ప్రయత్నం చేసింది.

తెలుగులో అల్లు శిరీష్ సరసన ‘గౌరవం’ సినిమాతో మళ్ళీ 2013లో టాలీవుడ్ లో ఎంట్రీ ఇచ్చింది. ఆ సినిమా కూడా నిరాశపరిచింది. ఆ తరువాత నితిన్ నటించిన ‘కొరియర్ బాయ్ కళ్యాణ్’ సినిమాతో 2015లో టాలీవుడ్ మరోసారి నటించింది. ఈ సినిమా కూడా ఫ్లాప్ గా నిలిచింది. దాంతీ మళ్ళీ ఈమెకి తెలుగు సినిమాలలో అవకాశాలు దక్కలేదు. అంతేకాదు యామీ గౌతమ్ హీరోయిన్ గా వేస్ట్ అని కామెంట్స్ చేశారు. తనకి కమర్షియల్ యాడ్ ఫిలింస్ తప్ప సినిమాలలో నటించే సత్తా లేదని మాట్లాడుకున్నారు. అయితే బాలీవుడ్‌లో హృతిక్ రోషన్ నటించిన కాబిల్ సినిమాలో అవకాశం అందుకుంది. అంధ యువతిగా అద్భుతమైన నటనను కనబరిచి అందరి ప్రశంసలు అందుకుంది.

ఈ సినిమా సూపర్ హిట్ అవడంతో బాలీవుడ్‌లో యామీ గౌతమ్ క్రేజీ హీరోయిన్‌గా మారింది. ప్రస్తుతం తాను బూత్ పోలీస్ అనే సినిమాలో నటించింది. ఈ సినిమా త్వరలో రిలీజ్ కానుంది. అలాగే లాస్ట్, దస్వీ అనే చిత్రాలు యామీ గౌతమ్ చేతిలో ఉన్నాయి. ఒకప్పుడు హీరోయిన్ గా పనికి రాదన్నవాళ్లే ఇప్పుడు తన సినిమాలను చూసి ప్రశంసిస్తున్నారు. కాగా యామీ గౌతమ్ కి యాడ్స్ లో బాగా పేరు తీసుకు వచ్చింది  ఫేర్ అండ్ లవ్లీ ఫేస్ క్రీమ్. దీనికి ఆమె బ్రాండ్ అంబాసిడర్ గా వ్యవహరిస్తోంది. ఈ యాడ్ చూసి యామీ గౌతమ్ కి అవకాశాలిచ్చిన వారున్నారు కూడా.