మరోసారి ఆసుపత్రిలో నెతన్యాహు.. అసలు ఆరోగ్య పరిస్థితిపై పెరుగుతున్న అనుమానాలు!

ఇజ్రాయెల్ ప్రధాని బెంజమిన్ నెతన్యాహు మరోసారి ఆసుపత్రిలో చేరడం ప్రపంచవ్యాప్తంగా చర్చకు దారితీసింది. జెరూసలంలోని వైద్య కేంద్రంలో ఆయనకు దంత చికిత్స జరుగుతోందని ప్రధానమంత్రి కార్యాలయం ప్రకటించినప్పటికీ, అసలు ఆరోగ్య పరిస్థితిపై మాత్రం స్పష్టత ఇవ్వలేదు. దీంతో నెతన్యాహు ఆరోగ్యంపై మళ్లీ అనుమానాలు వ్యక్తమవుతున్నాయి.

76 ఏళ్ల నెతన్యాహు గత కొంతకాలంగా వరుస ఆరోగ్య సమస్యలను ఎదుర్కొంటున్నారు. ఇటీవలే తనకు ప్రోస్టేట్ క్యాన్సర్ నిర్ధారణ అయ్యిందని, చికిత్స కూడా పూర్తయ్యిందని ఆయన వెల్లడించారు. అయితే ఆ వ్యాధి ఎప్పుడు బయటపడింది, ఎంతకాలం చికిత్స తీసుకున్నారనే వివరాలు మాత్రం అధికారికంగా వెల్లడించలేదు. దీంతో ఇజ్రాయెల్ రాజకీయ వర్గాల్లో చర్చ మరింత పెరిగింది.

ఇది మొదటిసారి కాదు. గతంలో డీహైడ్రేషన్ కారణంగా ఆసుపత్రిలో చేరిన నెతన్యాహుకు గుండె సంబంధిత సమస్యలు గుర్తించి పేస్‌మేకర్ అమర్చారు. అనంతరం హెర్నియా శస్త్రచికిత్స, ప్రోస్టేట్‌కు సంబంధించిన వైద్య చికిత్సలు కూడా జరిగాయి. ఇప్పుడు మళ్లీ ఆసుపత్రిలో చేరడంతో ఆయన ఆరోగ్య పరిస్థితిపై అంతర్జాతీయ మీడియా ప్రత్యేక దృష్టి సారించింది.

ఇజ్రాయెల్ ప్రభుత్వం తరచూ నెతన్యాహు ఆరోగ్య సమాచారాన్ని పరిమితంగానే బయటపెడుతోందనే విమర్శలు ఉన్నాయి. ప్రస్తుతం జరుగుతున్న చికిత్స నిజంగా సాధారణ దంత సమస్యకేనా? లేక మరేదైనా పెద్ద ఆరోగ్య సమస్య దాగి ఉందా? అన్న ప్రశ్నలు వినిపిస్తున్నాయి. మధ్యప్రాచ్యంలో ఉద్రిక్త పరిస్థితులు కొనసాగుతున్న వేళ దేశ ప్రధాని ఆరోగ్యంపై వస్తున్న వార్తలు ఇజ్రాయెల్ ప్రజల్లోనూ ఆందోళన పెంచుతున్నాయి.