పవన్‌కు బిగ్ రిలీఫ్.. సినిమాలపై పిటిషన్ ఔట్!

ఆంధ్రప్రదేశ్ డిప్యూటీ సీఎం, జనసేన అధినేత పవన్ కల్యాణ్కు హైకోర్టులో కీలక ఊరట లభించింది. ఆయన సినిమాల్లో నటించకుండా నిలువరించాలంటూ దాఖలైన ప్రజా ప్రయోజన వ్యాజ్యాన్ని ఉన్నత న్యాయస్థానం కొట్టివేసింది. ఈ పిటిషన్‌కు సరైన ఆధారాలు లేకపోవడంతో పాటు, విచారణార్హత కూడా లేదని కోర్టు స్పష్టం చేసింది.

మాజీ ఐఏఎస్ అధికారి విజయ్‌కుమార్ ఈ పిల్‌ను దాఖలు చేశారు. డిప్యూటీ సీఎం హోదాలో కొనసాగుతూ సినిమాల్లో నటించడం సరికాదని, ఇది నైతిక పరంగా తప్పు అని ఆయన వాదించారు. అలాగే హరిహర వీరమల్లు సినిమా ప్రమోషన్ కోసం ప్రభుత్వ వనరులను ఉపయోగించారని ఆరోపించారు. టికెట్ ధరల పెంపులో కూడా నిబంధనలు ఉల్లంఘించారని పేర్కొంటూ స్వతంత్ర దర్యాప్తు జరపాలని కోరారు.

ఈ పిటిషన్‌పై విచారణ సందర్భంగా ప్రభుత్వం తరఫున అడ్వొకేట్ జనరల్ వాదనలు వినిపించారు. మంత్రులు లేదా ప్రజాప్రతినిధులు సినిమాల్లో నటించకూడదని చెప్పే చట్టం ఎక్కడా లేదని కోర్టుకు వివరించారు. గతంలో కూడా ఇలాంటి అంశాలపై న్యాయస్థానాలు స్పష్టమైన అభిప్రాయం వ్యక్తం చేశాయని గుర్తుచేశారు. టికెట్ ధరల పెంపు విషయంలో ప్రభుత్వం సాధారణ ప్రక్రియలో భాగంగా నిర్ణయం తీసుకుందని, దానిలో డిప్యూటీ సీఎం వ్యక్తిగత పాత్ర లేదని తెలిపారు.

ఈ వాదనలను పరిగణలోకి తీసుకున్న న్యాయమూర్తి జస్టిస్ వెంకట జ్యోతిర్మయి, పిటిషన్‌లో ఉన్న ఆరోపణలకు తగిన ఆధారాలు లేవని అభిప్రాయపడ్డారు. కేవలం ఊహాగానాల ఆధారంగా దాఖలైన ఈ పిల్‌ను కొనసాగించడం సమంజసం కాదని పేర్కొంటూ దానిని కొట్టివేస్తున్నట్లు తీర్పు ఇచ్చారు.

ఈ తీర్పుతో పవన్ కల్యాణ్‌కు న్యాయపరంగా స్పష్టమైన ఊరట లభించినట్లైంది. ప్రస్తుతం ఆయన రాజకీయాలతో పాటు సినిమాల్లోనూ కొనసాగడానికి ఎలాంటి అడ్డంకులు లేవని స్పష్టమైంది. ఈ పరిణామం రాష్ట్ర రాజకీయాల్లో, సినీ వర్గాల్లో చర్చనీయాంశంగా మారింది.