హైదరాబాద్‌లో గంటపాటు లైట్లు ఆఫ్.. ఎర్త్ అవర్‌కు జీహెచ్‌ఎంసీ పిలుపు..!

పర్యావరణ పరిరక్షణపై అవగాహన పెంచేందుకు ప్రపంచవ్యాప్తంగా నిర్వహించే ఎర్త్ అవర్ 2026లో భాగంగా హైదరాబాద్ నగరం సిద్ధమైంది. ఈ సందర్భంగా నగర ప్రజలకు జీహెచ్‌ఎంసీ కీలక విజ్ఞప్తి చేసింది.

ఈరోజు రాత్రి 8:30 గంటల నుంచి 9:30 గంటల వరకు ఒక గంట పాటు అవసరం లేని విద్యుత్ దీపాలను స్వచ్ఛందంగా ఆపివేయాలని అధికారులు కోరుతున్నారు. విద్యుత్ వినియోగాన్ని తగ్గించడం ద్వారా పర్యావరణ పరిరక్షణలో భాగస్వాములు కావాలని పిలుపునిచ్చారు.

ఈ ఏడాది కార్యక్రమాన్ని “Give An Hour For Earth” అనే నినాదంతో నిర్వహిస్తున్నారు. వాతావరణ మార్పుల ప్రభావాన్ని తగ్గించేందుకు చిన్న చర్యలే పెద్ద మార్పులకు దారి తీస్తాయని అధికారులు చెబుతున్నారు. విద్యుత్ పొదుపు ద్వారా కార్బన్ ఉద్గారాలను తగ్గించడం ఈ కార్యక్రమ ప్రధాన లక్ష్యం.

నగరవ్యాప్తంగా ప్రభుత్వ కార్యాలయాలు, కీలక భవనాలు, ప్రజా ప్రదేశాల్లో ఇప్పటికే ఏర్పాట్లు పూర్తి చేశారు. ఐటీ సంస్థలు, వ్యాపార సముదాయాలు, అపార్ట్‌మెంట్ సంఘాలు కూడా ఈ కార్యక్రమంలో భాగస్వాములు కావాలని జీహెచ్‌ఎంసీ కోరింది.

ఈ ఒక గంట సమయాన్ని కేవలం లైట్లు ఆపివేయడానికే కాకుండా, పర్యావరణంపై ఆలోచించేందుకు ఉపయోగించుకోవాలని సూచించారు. భవిష్యత్ తరాలకు మంచి వాతావరణాన్ని అందించాలంటే ప్రతి ఒక్కరి బాధ్యత ఎంతో ముఖ్యమని అధికారులు గుర్తుచేశారు.

పర్యావరణ సంరక్షణలో చిన్నచిన్న చర్యలు కూడా పెద్ద మార్పులకు దారితీస్తాయని, ఈ కార్యక్రమం ద్వారా ప్రజల్లో చైతన్యం పెరుగుతుందని ఆశాభావం వ్యక్తమవుతోంది