వార్ 2 ప్రీ-రిలీజ్ వేడుకలో ఎన్టీఆర్ ఆగ్రహం.. ‘సీఎం సీఎం’ అని అరిచినందుకేనా?

మ్యాన్ ఆఫ్ మాసెస్ జూనియర్ ఎన్టీఆర్ (NTR) మరియు హృతిక్ రోషన్ కలిసి నటించిన వార్ 2 సినిమా ప్రీ-రిలీజ్ వేడుకలో ఎన్టీఆర్ ప్రసంగం అభిమానులను ఆకట్టుకున్నప్పటికీ, ఆయన చేసిన కొన్ని వ్యాఖ్యలు చర్చనీయాంశంగా మారాయి. ప్రసంగం మధ్యలో అభిమానుల అరుపులు, నినాదాల కారణంగా ఎన్టీఆర్ కొంత కోపం వ్యక్తం చేశారు. “బ్రదర్.. వెళ్ళిపోనా..? నేనేమన్నాను.. నేను మాట్లాడుతున్నప్పుడు సైలెంట్‌గా ఉండండి. నాకు ఒక్క సెకండ్ పట్టదు మైక్ ఇచ్చి వెళ్ళిపోతాను. ఓకే..! మాట్లాడనా.. తట్టుకోండి కాసేపు” అంటూ అభిమానులకు వార్నింగ్ ఇచ్చారు. ఈ ఆగ్రహం వెనుక రెండు ముఖ్య కారణాలు ఉన్నాయని విశ్లేషకులు చెబుతున్నారు.

‘బాద్ షా’ ఘటన మరియు భద్రతా సమస్యలు

ఎన్టీఆర్ ఆగ్రహం వెనుక మొదటి కారణం, ఆయన గతంలో ఎదుర్కొన్న చేదు అనుభవం. 2013లో ‘బాద్ షా’ ప్రీ-రిలీజ్ ఈవెంట్‌లో వరంగల్‌లో జరిగిన తొక్కిసలాటలో ఒక అభిమాని మృతి చెందాడు. ఆ ఘటన తనను తీవ్రంగా కలచివేసిందని ఎన్టీఆర్ ఈ వేడుకలో స్వయంగా గుర్తు చేసుకున్నారు. ఈ ఘటన తర్వాత ఆయన పబ్లిక్ ఈవెంట్లకు దూరంగా ఉంటూ వచ్చారు. నిన్నటి ఈవెంట్‌లో కూడా కొంతమంది అభిమానులు సెక్యూరిటీని దాటుకుని స్టేజ్‌పై ఉన్న ఎన్టీఆర్ దగ్గరకు వెళ్లేందుకు ప్రయత్నించారు. ఇది చూసిన ఎన్టీఆర్, భద్రతా కారణాల వల్ల, పాత సంఘటన గుర్తుకు వచ్చి కలత చెందారని తెలుస్తోంది. ఈ కారణంతోనే ఆయన మూడ్ మారిపోయి కోపం వ్యక్తం చేసినట్లు చెబుతున్నారు.

రాజకీయ నినాదాల పట్ల అసహనం

ఎన్టీఆర్ ఆగ్రహం వెనుక ఉన్న మరో ముఖ్య కారణం రాజకీయ నినాదాలు. వేడుక ప్రారంభంలోనే కొంతమంది అభిమానులు ఎన్టీఆర్‌ను ఉద్దేశించి ‘సీఎం, సీఎం’ అంటూ నినాదాలు చేశారు. పక్కన ఉన్న యాంకర్ కూడా అదే నినాదాన్ని ఉత్సాహంగా పునరావృతం చేయడం నెగెటివ్ కామెంట్లకు దారితీసింది. రాజకీయాల విషయానికి వస్తే ఎన్టీఆర్ ఎప్పుడూ ఆ టాపిక్‌ను తప్పించుకునే ప్రయత్నం చేస్తారు. అయినప్పటికీ, అభిమానులు తరచుగా ఆయనను రాజకీయ చర్చల్లోకి లాగుతున్నారని అంటున్నారు.

ఈ నేపధ్యంలో, స్పీచ్ ఇస్తున్న సమయంలో ‘సీఎం సీఎం’ నినాదాలు మళ్లీ వినిపించడంతో ఎన్టీఆర్ డిస్టర్బ్ అయి ఆగ్రహం వ్యక్తం చేసినట్లు మరో వర్గం చెబుతోంది. ఏదేమైనా, ఈ సంఘటనతో ఎన్టీఆర్ హర్ట్ అయ్యారని, అభిమానుల నుంచి ఇలాంటి ప్రవర్తనను ఆయన ఆశించలేదని మాత్రం స్పష్టమవుతోంది.