జబర్దస్త్‌లో 108 ఎపిసోడ్లు చేసిన నటుడు.. ఇప్పుడు షాప్ నడుపుతున్నాడు

సినీ పరిశ్రమలో ప్రతిభ ఒక్కటే సరిపోదు.. అదృష్టం కూడా తోడైతేనే కెరీర్ సాఫీగా సాగుతుంది. ఇదే విషయాన్ని మరోసారి గుర్తు చేస్తున్నాడు నటుడు తిరుపతి ప్రకాష్. ఎన్నో సినిమాల్లో చిన్న చిన్న పాత్రలతో ప్రేక్షకులను అలరించిన ఆయన, తర్వాత టెలివిజన్‌లో కూడా తనదైన గుర్తింపు సంపాదించారు. ముఖ్యంగా జబర్దస్త్ కార్యక్రమంలో చేసిన స్కిట్స్‌తో ప్రేక్షకులకు దగ్గరయ్యారు.

2015 నుంచి 2018 వరకు దాదాపు 180 ఎపిసోడ్‌లలో కనిపించిన ప్రకాష్, ఆ తర్వాత అవకాశాలు తగ్గిపోవడంతో కష్టకాలాన్ని ఎదుర్కొన్నాడు. “ఇకపై ఏం చేయాలి?” అనే ప్రశ్న తన ముందుకొచ్చిందని ఆయన ఓ ఇంటర్వ్యూలో వెల్లడించారు. దర్శకులు సంప్రదించకపోవడం, కొత్త ప్రాజెక్టులు రాకపోవడం వల్ల జీవితంలో అనిశ్చితి నెలకొందని చెప్పారు.

ఈ సమయంలో తన తండ్రి చెప్పిన మాటలు తనకు మార్గదర్శకంగా మారాయని ఆయన గుర్తుచేసుకున్నారు. ఆ ప్రేరణతోనే కొత్త దారిని ఎంచుకోవాలని నిర్ణయించుకుని, వ్యాపార రంగంలో అడుగుపెట్టారు. తాను చేయగలిగిన స్థాయిలో చిన్న వ్యాపారం ప్రారంభించాలనే ఆలోచనతో కాఫీ పొడి దుకాణాన్ని ప్రారంభించినట్లు తెలిపారు.

మొదట టిఫిన్ సెంటర్ లేదా కిరాణా దుకాణం పెట్టాలనుకున్నప్పటికీ, వాటిపై అవగాహన లేకపోవడంతో ఆ ఆలోచనలను విరమించుకున్నానని చెప్పారు. ఆ తర్వాత పరిచయస్తుల సూచనతో కాఫీ వ్యాపారం వైపు మొగ్గుచూపినట్లు వెల్లడించారు. సరైన మార్గదర్శకత్వంతో కాఫీ మిశ్రమం తయారీ పద్ధతులు నేర్చుకుని, 2019లో తన వ్యాపారాన్ని ప్రారంభించారు.

ప్రారంభంలో సినీ నటుడు దుకాణం పెట్టడం చూసి చాలామంది ఆశ్చర్యపోయారని ఆయన తెలిపారు. “సినిమాలు లేవా?” అని ప్రశ్నించినప్పుడు, తాను ఎలాంటి సంకోచం లేకుండా నిజాయితీగా సమాధానం చెప్పేదాన్నని చెప్పారు. కోవిడ్ కాలం వరకు తన జేబు నుంచే ఖర్చులు భరించి వ్యాపారాన్ని కొనసాగించానని గుర్తుచేశారు.

చిన్న స్థాయిలో మొదలైన ఈ ప్రయాణం ఇప్పుడు స్థిరపడిందని ప్రకాష్ సంతోషంగా చెప్పారు. కొద్ది కిలోల కాఫీ గింజలతో ప్రారంభించిన తన వ్యాపారం, ప్రస్తుతం మంచి కస్టమర్ బేస్‌ను సంపాదించిందని తెలిపారు. బయట వాళ్లు ఏమనుకున్నా పట్టించుకోకుండా, స్వయంగా కష్టపడి నిలబడటమే తన లక్ష్యమని స్పష్టం చేశారు.

అలాగే తనకు అవకాశం ఇచ్చిన పరిశ్రమను మరచిపోనని, కష్టాల్లో ఉన్న సహచరులకు సాధ్యమైనంత సహాయం చేస్తానని ఆయన అన్నారు. ఈ వ్యాఖ్యలతో ఆయన జీవన ప్రయాణం ఎంత స్ఫూర్తిదాయకమో మరోసారి బయటపడింది.