దోశ పిండితో విషాదం… ఇద్దరు చిన్నారుల మృతి

గుజరాత్‌లోని అహ్మదాబాద్లో చోటుచేసుకున్న విషాదకర ఘటన ఒక కుటుంబాన్ని శోకసంద్రంలో ముంచేసింది. దుకాణంలో కొనుగోలు చేసిన దోశ పిండితో చేసిన ఆహారం తిన్న తర్వాత ఒకే కుటుంబానికి చెందిన ఇద్దరు చిన్నారులు ప్రాణాలు కోల్పోవడం తీవ్ర ఆవేదన కలిగిస్తోంది. తల్లిదండ్రులు ప్రస్తుతం ఆసుపత్రిలో ప్రాణాపాయ స్థితిలో చికిత్స పొందుతున్నారు.

పోలీసులు తెలిపిన వివరాల ప్రకారం, విమల్ అనే వ్యక్తి స్థానికంగా ఉన్న ఘనశ్యామ్ డెయిరీ నుంచి దోశ పిండి కొనుగోలు చేశారు. మరుసటి రోజు ఉదయం ఆ పిండితో తయారు చేసిన దోశలను కుటుంబ సభ్యులు తిన్నారు. తిన్న కొద్దిసేపటికే వారికి వాంతులు, అస్వస్థత లక్షణాలు కనిపించాయి. అదే సమయంలో తల్లి పాలు తాగిన మూడు నెలల శిశువుకూ ఆరోగ్య సమస్యలు తలెత్తడంతో పరిస్థితి మరింత విషమించింది.

తక్షణమే కుటుంబంలోని నలుగురిని ఆసుపత్రికి తరలించగా, చికిత్స పొందుతూ మూడు నెలల శిశువు, అనంతరం నాలుగేళ్ల బాలిక మరణించడం హృదయ విదారకంగా మారింది. ప్రస్తుతం తల్లిదండ్రుల ఆరోగ్య పరిస్థితి కూడా ఆందోళనకరంగానే ఉందని వైద్యులు తెలిపారు.

ఈ ఘటనపై కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. సంఘటనపై పూర్తి స్పష్టత కోసం ఆహార నమూనాలను సేకరించి పరీక్షలకు పంపారు. మున్సిపల్ అధికారులు పిండి నమూనాలను విశ్లేషణ కోసం ప్రయోగశాలకు పంపినట్టు తెలిపారు. పోస్టుమార్టం నివేదికలు వచ్చిన తర్వాతే మరణాలకు ఖచ్చితమైన కారణం తెలుస్తుందని అధికారులు పేర్కొన్నారు.

ఇక ఆరోపణలపై స్పందించిన డెయిరీ యజమాని ఘనశ్యామ్ షా, తమ ఉత్పత్తిలో ఎలాంటి లోపం లేదని వాదించారు. అదే రోజు విక్రయించిన ఇతర పిండిని ఉపయోగించిన వినియోగదారుల నుంచి ఎలాంటి ఫిర్యాదులు రాలేదని తెలిపారు. ఈ ఘటన అనంతరం సంబంధిత కస్టమర్లను సంప్రదించినప్పటికీ ఎటువంటి సమస్యలు లేవని వారు చెప్పినట్టు వివరించారు.

ఈ దుర్ఘటన ఆహార భద్రతపై మరోసారి ఆందోళనలు రేకెత్తిస్తోంది. ఇంటికి తీసుకువచ్చే ఆహార పదార్థాల నాణ్యతపై జాగ్రత్తలు ఎంత ముఖ్యమో ఈ ఘటన స్పష్టంగా చెబుతోంది. దర్యాప్తు పూర్తయ్యాక అసలు కారణాలు వెలుగులోకి వచ్చే అవకాశం ఉంది.