మొన్న కులం చెప్పి వార్తల్లో.. ఇవాళ “కులం వద్దు” అంటూ వైరల్..

తమిళ నటుడు, దర్శకుడు ఆర్ పార్తిబన్ తాజాగా చేసిన వ్యాఖ్యలు మరోసారి చర్చనీయాంశంగా మారాయి. ఇటీవల విడుదలకు సిద్ధమైన ఉస్తాద్ భగత్ సింగ్ ప్రీ రిలీజ్ ఈవెంట్‌లో పాల్గొన్న ఆయన, తన కుటుంబ మూలాల గురించి మాట్లాడినప్పుడు కుల అంశాన్ని ప్రస్తావించడం వివాదానికి దారి తీసింది. ఈ వ్యాఖ్యలపై కొంతమంది విమర్శలు చేయడంతో, అప్పుడే పార్తిబన్ క్షమాపణలు తెలిపారు.

ఈ వివాదం తర్వాత ఆయన తీసుకున్న నిర్ణయం ఇప్పుడు మరోసారి వార్తల్లో నిలిపింది. కులం, మతం అనే గుర్తింపుల నుంచి బయటపడాలనే ఉద్దేశంతో “నో కాస్ట్ – నో రిలీజియన్” సర్టిఫికెట్ పొందాలని పార్తిబన్ కోర్టును ఆశ్రయించారు. ఈ పిటిషన్‌పై విచారణ జరిపిన కోర్టు, నిర్దిష్ట గడువులోగా ఆయనకు సంబంధిత ధృవపత్రం జారీ చేయాలని అధికారులకు ఆదేశాలు ఇచ్చింది.

ఈ సందర్భంగా మీడియాతో మాట్లాడిన పార్తిబన్, కోర్టు తీర్పుపై సంతృప్తి వ్యక్తం చేశారు. కులం, మతం అనే భావనలు తనకు అవసరం లేదని, ఇటీవల జరిగిన సంఘటన తర్వాత తనలో ఆలోచన మరింత బలపడిందని చెప్పారు. తన మాటల వల్ల ఎవరైనా బాధపడి ఉంటే దానికి తాను బాధపడుతున్నానని, అందుకే ఈ నిర్ణయం తీసుకున్నానని వివరించారు.

ఇకపై తాను ఎలాంటి కులం, మతానికి చెందినవాడిని కాదని అధికారికంగా గుర్తింపు పొందాలని కోరుకుంటున్నానని తెలిపారు. సమాజంలో కులమత భేదాలు లేకుండా జీవించే విధానాన్ని ప్రోత్సహించాలన్నదే తన ఉద్దేశమని చెప్పారు. ఇది తన వ్యక్తిగత నిర్ణయం మాత్రమే కాకుండా, సమాజానికి ఒక సందేశమని పేర్కొన్నారు.

అయితే ఈ సర్టిఫికెట్ పొందడానికి సాధారణ ప్రజలు కూడా కోర్టును ఆశ్రయించాల్సి రావడం సరైన విధానం కాదని ఆయన అభిప్రాయపడ్డారు. ఈ ప్రక్రియను సులభతరం చేయాల్సిన అవసరం ఉందని సూచించారు. అలాగే కులంతో వచ్చే ఎలాంటి ప్రయోజనాలు కూడా తాను కోరుకోవడం లేదని, కేవలం తన కృషితోనే ముందుకు సాగాలని నిర్ణయించుకున్నానని తెలిపారు.

ఈ పరిణామంతో పార్తిబన్ మరోసారి వార్తల్లో నిలిచారు. ఒకవైపు కులంపై వ్యాఖ్యలు చేసి వివాదంలో చిక్కుకున్న ఆయన, ఇప్పుడు అదే విషయంపై భిన్నమైన నిర్ణయం తీసుకోవడం చర్చకు దారి తీసింది.