Pawan Kalyan : ‘రప్పా రప్పా’ అంటే భయపడతామా? వైసీపీపై పవన్ కళ్యాణ్ తీవ్ర విమర్శలు!

ఏపీ డిప్యూటీ సీఎం పవన్ కళ్యాణ్ తాజాగా వైఎస్సార్ కాంగ్రెస్ నేతలపై తీవ్ర విమర్శలు చేశారు. “మాట్లాడితే రప్పా రప్పా అంటున్నారు. వాళ్ల తాకాటుకు తాము భయపడేది లేదని, బెదిరింపులకు తలొగ్గేది కాదని స్పష్టం చేశారు. రప్పా రప్పా అంటే చూస్తూ ఊరు కుంటామా?” అంటూ సూటిగా ఎదురు ప్రశ్నించారు. తాము ఎంతో కృషి చేసి, ఉద్యమాల ద్వారా ప్రజల్లో నమ్మకాన్ని పొందామని గుర్తు చేశారు. అలాంటి వారిని బెదిరిస్తే ఒప్పుకునే ప్రసక్తే లేదన్నారు. గత పాలకులు ఎలా ప్రజల తిరస్కారానికి గురయ్యారో ఇప్పుడే చూస్తున్నామని చెప్పారు.

మద్యం పాలసీపై ఆగ్రహం: “ప్రజల ప్రాణాలు తీశారు”

మంగళవారం సాయంత్రం మీడియాతో మాట్లాడిన పవన్ కళ్యాణ్, వైసీపీ పాలనలో మద్యం పాలసీపై ఆగ్రహం వ్యక్తం చేశారు. “2019 ఎన్నికల ముందు మద్యం నిషేధం చేస్తామని హామీ ఇచ్చారు. కానీ అధికారంలోకి వచ్చాక దాన్ని పూర్తిగా విస్మరించి, ధరలు పెంచి ప్రజల ఆరోగ్యాన్ని పాడుచేశారు” అని విమర్శించారు. నాసిరకం మద్యం వల్ల పలువురు మృతి చెందారని ఆరోపించారు. “డబ్బు పోతే ఓకే.. కానీ ప్రజల ప్రాణాలు తీసే విధంగా వ్యవహరించారా?” అని జగన్ ప్రభుత్వాన్ని ప్రశ్నించారు.

లిక్కర్ స్కాం, కేసుల విచారణపై స్పష్టత

లిక్కర్ స్కామ్‌లో పలువురు అరెస్టై ఉండటం గురించి కూడా పవన్ స్పందించారు. తప్పు చేశారనే గానీ వారిని అరెస్ట్ చేశారని, ఇది ఒక్కటే వైసీపీ పాలన అసలైన దారుణాన్ని బయటపెడుతోందని అన్నారు. పైగా తప్పు చేసి ప్రజలను ఎదిరిస్తూ బెదిరింపులకు పాల్పడుతున్నారని ఆరోపించారు. “ఈ పేపర్ పులులు, తాటాకు చప్పుళ్లకు కూటమి భయపడదు. తాము న్యాయ బద్ధంగా కేసుల విచారణ జరిపిస్తామని, తప్పు చేసిన ఎవరినీ వదిలే ప్రసక్తే లేదని” పవన్ స్పష్టం చేశారు.