వరుస ఓటములకు బ్రేక్?.. ధోనీతో మళ్లీ బలంగా సీఎస్‌కే

ఐపీఎల్ 2026 సీజన్‌లో వరుస పరాజయాలతో ఇబ్బందులు ఎదుర్కొంటున్న చెన్నై సూపర్ కింగ్స్ అభిమానులకు ఊరటనిచ్చే వార్తలు వెలువడ్డాయి. సీజన్ ఆరంభంలోనే మూడు మ్యాచ్‌లు ఓడిపోయి పాయింట్ల పట్టికలో వెనుకబడిన జట్టుకు, ఇప్పుడు కీలక ఆటగాళ్ల రీఎంట్రీ ఆశలు రేకెత్తిస్తోంది.

ముఖ్యంగా, జట్టు ఆత్మగా భావించే ఎంఎస్ ధోనీ తిరిగి మైదానంలోకి అడుగుపెట్టే అవకాశం ఉండడం అభిమానుల్లో ఉత్సాహాన్ని పెంచుతోంది. కాలి కండరాల గాయం కారణంగా ఇప్పటివరకు ఒక్క మ్యాచ్ కూడా ఆడని ధోనీ, ఇప్పుడు పూర్తిగా కోలుకున్నట్లు సమాచారం. ఫిట్‌నెస్ టెస్టుల్లో కూడా ఆయన సంతృప్తికర ఫలితాలు సాధిస్తున్నారని తెలిసింది.

అన్నీ అనుకూలంగా సాగితే, ఏప్రిల్ 14న చెన్నైలోని ఎంఏ చిదంబరం స్టేడియంలో కోల్‌కతా నైట్ రైడర్స్తో జరిగే మ్యాచ్‌లో ధోనీ తిరిగి జట్టులోకి రావచ్చని తెలుస్తోంది. ఆయన గైర్హాజరీలో జట్టులో అనుభవం లోపం స్పష్టంగా కనిపించగా, రీఎంట్రీతో పరిస్థితి మారుతుందని టీమ్ మేనేజ్‌మెంట్ భావిస్తోంది.

ఇక మరో శుభవార్తగా, యువ ఆటగాడు డెవాల్డ్ బ్రేవిస్ కూడా ఫిట్‌నెస్ సాధించి తిరిగి జట్టులోకి రాబోతున్నాడు. టోర్నీ ప్రారంభానికి ముందు గాయపడిన బ్రేవిస్, ఇప్పుడు పూర్తి స్థాయిలో కోలుకుని మళ్లీ బరిలోకి దిగేందుకు సిద్ధంగా ఉన్నాడు. ఏప్రిల్ 11న జరగనున్న మ్యాచ్‌లోనే అతను ఆడే అవకాశాలు ఉన్నట్లు సమాచారం.

తాజాగా మాట్లాడిన బ్రేవిస్, ఆటకు దూరంగా ఉండడం కష్టంగా అనిపించినప్పటికీ, ఇప్పుడు మరింత ఉత్సాహంతో తిరిగి వస్తున్నానని చెప్పాడు. ప్రాక్టీస్‌లో తన ఫామ్ బాగుందని, మైదానంలో మంచి ప్రదర్శన ఇవ్వాలని ఎదురుచూస్తున్నానని వెల్లడించాడు.

ఈ ఇద్దరు కీలక ఆటగాళ్లు జట్టులోకి రావడం చెన్నైకు పెద్ద ఊరటగా మారనుంది. ఇప్పటికే వరుస ఓటములతో ఒత్తిడిలో ఉన్న జట్టుకు ఇది మలుపుతిప్పే అవకాశం అని అభిమానులు ఆశాభావం వ్యక్తం చేస్తున్నారు. ధోనీ నాయకత్వం, బ్రేవిస్ ఆగ్రెసివ్ బ్యాటింగ్ కలిస్తే చెన్నై మళ్లీ విజయాల బాట పడుతుందనే నమ్మకం వ్యక్తమవుతోంది