బస్సు-లారీ ఢీ.. మంటల్లో చిక్కుకుని ప్రాణాలు కోల్పోయిన ప్రయాణికులు..!

ఆంధ్రప్రదేశ్‌లో విషాదాన్ని మిగిల్చిన ఘోర రోడ్డు ప్రమాదం చోటుచేసుకుంది. మార్కాపురం సమీపంలో తెల్లవారుజామున జరిగిన ఈ ఘటనలో ప్రాణనష్టం భారీగా చోటుచేసుకోవడం కలచివేస్తోంది. ప్రైవేట్ బస్సు, టిప్పర్ లారీ ఢీకొనడంతో 10 మంది ప్రయాణికులు మంటల్లో చిక్కుకుని సజీవదహనం అయ్యారు.

ప్రాథమిక సమాచారం ప్రకారం, హైదరాబాద్ నుంచి ప్రకాశం జిల్లా పామూరుకు వెళ్తున్న ప్రైవేట్ బస్సులో సుమారు 40 మంది ప్రయాణికులు ఉన్నారు. రాయవరం సమీపంలోని క్వారీల వద్దకు చేరుకునే సమయానికి ఎదురుగా వస్తున్న టిప్పర్ లారీని బస్సు ఢీకొట్టింది. ఢీకొట్టిన తీవ్రతకు బస్సు డీజిల్ ట్యాంక్ పగిలిపోవడంతో ఒక్కసారిగా మంటలు చెలరేగాయి.

మంటలు వేగంగా వ్యాపించడంతో బస్సు మొత్తం అగ్నికి ఆహుతైంది. ప్రమాదం జరిగిన సమయంలో ఎక్కువ మంది ప్రయాణికులు నిద్రలో ఉండటంతో పరిస్థితిని అర్థం చేసుకునేలోపే మంటలు వ్యాపించాయి. కొందరు అద్దాలు పగలగొట్టి బయటకు దూకి ప్రాణాలు కాపాడుకోగా, 10 మంది మాత్రం బయటకు రాలేక మంటల్లోనే చిక్కుకుని ప్రాణాలు కోల్పోయారు.

సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనాస్థలానికి చేరుకుని మంటలను అదుపులోకి తీసుకొచ్చారు. గాయపడిన వారిని సమీప ఆసుపత్రికి తరలించి చికిత్స అందిస్తున్నారు. పలువురి పరిస్థితి విషమంగా ఉండటంతో మృతుల సంఖ్య పెరిగే అవకాశం ఉందని అధికారులు ఆందోళన వ్యక్తం చేస్తున్నారు.

ఈ ప్రమాదంలో మృతదేహాలు తీవ్రంగా కాలిపోవడంతో వారి గుర్తింపులో ఇబ్బందులు ఎదురవుతున్నాయి. దీనిపై ప్రత్యేక బృందాలు పని చేస్తున్నాయి. ప్రమాదానికి గల కారణాలపై పోలీసులు కేసు నమోదు చేసి దర్యాప్తు ప్రారంభించారు.

ఈ ఘటన స్థానికంగా తీవ్ర విషాదాన్ని మిగిల్చింది. కుటుంబ సభ్యులు, బంధువులు కన్నీటి పర్యంతమవుతున్నారు. వరుసగా జరుగుతున్న రోడ్డు ప్రమాదాల నేపథ్యంలో రహదారి భద్రతపై మరింత కట్టుదిట్టమైన చర్యలు తీసుకోవాల్సిన అవసరం ఉందని నిపుణులు సూచిస్తున్నారు.