అక్టోబర్ నుంచి 12 నుంచి 17 ఏళ్ల పిల్లలకు కరోనా వ్యాక్సిన్.. సూది లేకుండానే టీకా..!

ఓ వైపు కరోనా వ్యాక్సిన్ అందుబాటులోకి వచ్చినా.. కరోనా కేసులు కూడా చాపకింద నీరులా పెరుగుతూనే ఉన్నాయి. ఇప్పటికే 18 ఏళ్లు అంతకంటే ఎక్కువ వయస్సు ఉన్న ప్రతీ ఒక్కరికి కరోనా వ్యాక్సిన్ కార్యక్రమం కొనసాగుతోంది. అయితే 12 నుంచి 17 ఏళ్ల లోపు పిల్లలకు కూడా వ్యాక్సిన్ తీసుకునేవిధంగా కొన్ని దేశాలు అవకాశాన్ని కల్పిస్తూనే ఉన్నాయి. కానీ మన దేశంలో ఇప్పటి వరకు చిన్న పిల్లలకు వ్యాక్సిన్ వేసేందుకు అవకాశం ఇవ్వలేదు.

కానీ తాజాగా వైద్య నిపుణులు వారి కోసం గుడ్ న్యూస్ చెప్పింది. 12 సంవత్సరాలు అంతకంటే ఎక్కువ వయస్సు ఉన్న పిల్లల కోసం కరోనా వ్యాక్సిన్​ Zycov-Dని డ్రగ్స్ కంట్రోలర్ జనరల్ ఆఫ్ ఇండియా ఆమోదం తెలిపింది. దీనికి సంబంధించి పనులు కూడా వేగంగా కొనసాగుతున్నాయి. దేశంలో 12 నుంచి 17 ఏళ్ల వయస్సున్న పిల్లలు దాదాపు 12 కోట్ల మంది ఉన్నట్లు అధికారులు అంచనా వేశారు. అక్టోబర్ మొదటి వారం నుంచి టీకాలు అందుబాటులోకి వస్తాయని జైడస్ కాడిలా కంపెనీ తెలిపిందని కోవిడ్ వర్కింగ్ గ్రూప్ కమిటీ చైర్మన్ డాక్టర్ ఎన్ కే అరోరా అన్నారు.

మొదట తీవ్రమైన వ్యాధులతో బాధపడే వారికి ఇవ్వనున్నట్లు సమాచారం. తర్వాత వచ్చే సంవత్సరం మార్చి నుంచి మిగతా వారికి ఇచ్చే ఆలోచనలో ఉన్నట్లు తెలుస్తోంది. అయితే ఇప్పటికే నేషనల్ టెక్నికల్ అడ్వైజరీ గ్రూప్ తీవ్ర అనారోగ్యాల జాబితా సిద్ధం చేస్తుంది. ఆ జాబితా ప్రకారం పిల్లలకు టీకాలు ఇవ్వబడుతాయి.

2021 డిసెంబర్ చివరి నాటికి 18 ఏళ్లు పైబడిన వారందరికీ టీకాలు ఇవ్వాలనేది కేంద్ర ప్రభుత్వం యొక్క లక్ష్యం అని కోవిడ్ వర్కింగ్ గ్రూప్ కమిటీ చైర్మన్ పేర్కొన్నారు. చిన్న పిలలకు ఇచ్చే ఈ టీకా మాత్రం మూడు డోసుల్లో ఇవ్వనున్నారు. ప్రతీ డోసుకు దాదాపు 28 రోజుల విరామం ఉండనున్నట్లు తెలిపారు. దీనికి సూది అవసరం లేకుండా టీకా ఇవ్వనున్నట్లు తెలుస్తోంది.