డెబిట్ కార్డ్ సైజులో ఆధార్.. ఎలా పొందాలంటే..!!

ఈరోజుల్లో మనం ఎలాంటి ప్రభుత్వ పథకానికి అర్హత పొందాలన్నా, స్కాలర్ షిప్ పొందాలన్నా, గుర్తింపు కార్డుగా కూడా ఆధార్ కార్డ్ ఉపయోగపడుతుంది. ఆధార్ కార్డ్ లేని వాళ్లు పడే అవస్థలు అన్నీఇన్నీ కాదు. ఆధార్ కార్డ్ దేశంలో ఎక్కడైనా ఉపయోగపడుతుంది. అయితే ప్రజలు ఆధార్ ను చిన్న సైజులో అందుబాటులోకి తెస్తే బాగుంటుందని పలు సందర్భాల్లో అభిప్రాయపడ్డారు. దీంతో కేంద్రం చిన్న సైజులో ఆధార్ కార్డులు ప్రజలకు ఇవ్వడానికి సిద్ధమైంది.

ఎవరైతే ఎక్కువగా ప్రయాణాలు చేస్తారో, ఆధార్ కార్డుతో ఎక్కువగా ఎవరికైతే అవసరం ఉంటుందో వారికి ఈ చిన్నసైజు కార్డు ఎంతగానో ఉపయోగపడుతుంది. ఈ కార్డును పర్సులో సులభంగా ఎక్కడికైనా తీసుకెళ్లవచ్చు. పాలి వినైల్ క్లోరైడ్ తో తయారు చేసిన కార్డు కావడంతో ఈ కార్డు క్వాలిటీతో ఉంటుంది. ఆధార్ వెబ్ సైట్ లోకి వెళ్లడం ద్వారా దరఖాస్తు చేసిన రోజు నుంచి పది రోజుల్లో ఈ కార్డును పొందవచ్చు.

దరఖాస్తు చేసిన రోజు నుంచి పది రోజుల్లో పాలి వినైల్ క్లోరైడ్ తో తయారు చేసిన ఆధార్ కార్డు ఇంటికి చేరుతుంది. కార్డ్ పొందాలంటే మొదట https://uidai.gov.in/ గెట్ ఆధార్ అనే విభాగంలోకి వెళ్లాలి. అందులో order aadhaar pvc card అనే ఆప్షన్ ను ఎంచుకుని ఆధార్ కార్డ్ నంబర్ లేదా వర్చువల్ ఐడీ లేదా ఎన్ రోల్ మెంట్ ఐడీని ఎంటర్ చేయాలి. ఆ తరువాత సెక్యూరిటీ కోడ్, మొబైల్ నంబర్, వన్ టైమ్ పాస్ వర్డ్ ను ఎంటర్ చేయాలి.

అందులో వివరాలను చెక్ చేసుకొని ఉన్న ఆప్షన్లలో ఏదో ఒక ఆప్షన్ ను ఎంచుకుని కార్డుకు 50 రూపాయలు పే చేయాలి. అమౌంట్ పే చేసిన తరువాత వచ్చే రిసిప్ట్ లో ఎస్.ఆర్.ఎన్ నంబర్ ఉంటుంది. ఆ నంబర్ సహాయంతో దరఖాస్తు చేసిన ఆధార్ కార్డ్ స్టేటస్ తెలుసుకోవచ్చు. ఈ విధంగా చిన్న సైజ్ ఆధార్ కార్డ్ ను సులభంగా పొందవచ్చు.