కిట్‌క్యాట్ కంటెయినర్ మాయం.. రూ.1.5 కోట్ల చాక్లెట్లు గల్లంతు..!

ప్రపంచ ప్రఖ్యాత చాక్లెట్ బ్రాండ్ కిట్‌క్యాట్కు చెందిన భారీ సరుకు దొంగతనం కావడం సంచలనం సృష్టించింది. ఈ ఘటనలో సుమారు రూ.1.5 కోట్ల విలువైన చాక్లెట్ల కంటెయినర్‌ను హైటెక్ పద్ధతిలో అపహరించినట్లు సమాచారం.

ఈ సరుకును ఇటలీ నుంచి పోలాండ్కు తరలిస్తున్న సమయంలో ఈ చోరీ జరిగింది. ప్రముఖ సంస్థ నెస్‌లేకు చెందిన ఈ షిప్‌మెంట్ మాయమవ్వడంతో అంతర్జాతీయ స్థాయిలో కలకలం రేగింది.

పోలీసులు తెలిపిన వివరాల ప్రకారం, నిందితులు ముందుగానే పక్కా ప్రణాళికతో రంగంలోకి దిగారు. నకిలీ రవాణా పత్రాలు, ఫేక్ ఐడెంటిటీ కార్డులు తయారు చేసి అసలైన డ్రైవర్ రాకముందే ఫ్యాక్టరీకి చేరుకున్నారు. అక్కడి సిబ్బందిని నమ్మబలికి చాక్లెట్లతో నిండిన ట్రక్కును సులభంగా తీసుకెళ్లడం గమనార్హం.

ట్రక్కు ఇటలీ సరిహద్దు దాటిన తర్వాత కొద్దిసేపటికే జీపీఎస్ సిగ్నల్ ఆగిపోవడం అనుమానాలకు తావిచ్చింది. సిగ్నల్‌ను నిలిపివేయడానికి జామర్లను ఉపయోగించి ఉంటారని అధికారులు భావిస్తున్నారు. దీంతో ట్రక్కు ఆచూకీ తెలియకుండా పోయింది.

ఈ ఘటనపై ఇటలీ, జర్మనీ, పోలాండ్ దేశాల పోలీసులు సంయుక్తంగా దర్యాప్తు చేపట్టారు. ఇలాంటి ఘటనలు సాధారణంగా ఖరీదైన ఎలక్ట్రానిక్ వస్తువుల విషయంలో కనిపిస్తాయి. కానీ ఆహార పదార్థాలను లక్ష్యంగా చేసుకోవడం కొత్త ట్రెండ్‌గా మారుతుండటం ఆందోళన కలిగిస్తోంది.

ఇదిలా ఉండగా, నెస్‌లే ఈ ఘటనను తమ సరఫరా వ్యవస్థపై జరిగిన పద్ధతిపూర్వక దాడిగా అభివర్ణించింది. ఈ చోరీ కారణంగా పోలాండ్, తూర్పు యూరప్ ప్రాంతాల్లో కిట్‌క్యాట్ సరఫరాకు తాత్కాలిక అంతరాయం ఏర్పడే అవకాశం ఉందని సమాచారం.

దొంగలు ఈ చాక్లెట్లను బ్లాక్ మార్కెట్‌లో విక్రయించే ఉద్దేశంతోనే ఈ దుశ్చర్యకు పాల్పడి ఉండవచ్చని అధికారులు అనుమానిస్తున్నారు. ప్రస్తుతం నిందితుల కోసం గాలింపు కొనసాగుతోంది.