ఏప్రిల్ 1 నుంచి రైల్వే కొత్త రూల్స్.. టికెట్ రద్దుపై భారీ మార్పులు!

దేశవ్యాప్తంగా రైలు ప్రయాణికులకు ఉపశమనం కలిగించేలా భారతీయ రైల్వేలు కీలక నిర్ణయం తీసుకుంది. టికెట్ రద్దు, రిఫండ్ విధానం మరియు బోర్డింగ్ స్టేషన్ మార్పులపై నిబంధనలను సవరించి కొత్త మార్గదర్శకాలను ప్రకటించింది. ఈ మార్పులు ఏప్రిల్ 1 నుంచి దశలవారీగా అమల్లోకి రానున్నాయి.

ప్రయాణికులకు సౌలభ్యం కల్పించడమే కాకుండా, టికెట్ల బ్లాక్ మార్కెటింగ్‌ను అరికట్టడమే ఈ నిర్ణయాల ప్రధాన ఉద్దేశమని రైల్వే శాఖ తెలిపింది. ముఖ్యంగా దళారులు పెద్ద మొత్తంలో టికెట్లు బుక్ చేసి, చివరి నిమిషంలో రద్దు చేసి లాభాలు పొందుతున్న వ్యవహారాన్ని నియంత్రించేందుకు ఈ మార్పులు తీసుకువచ్చారు.

ఈ నేపథ్యంలో రైల్వే మంత్రి అశ్విని వైష్ణవ్ మాట్లాడుతూ, ప్రయాణికులకు న్యాయం చేయడమే లక్ష్యంగా ఈ సవరణలు చేశామని పేర్కొన్నారు. టికెట్లను ముందుగానే బ్లాక్ చేసి, అవసరం లేకపోతే చివర్లో రద్దు చేయడం వల్ల అసలైన ప్రయాణికులు ఇబ్బందులు పడుతున్నారని ఆయన వివరించారు.

కొత్త రిఫండ్ విధానం ప్రకారం, టికెట్‌ను ఎంత ముందుగా రద్దు చేస్తే అంత ఎక్కువ మొత్తంలో డబ్బు తిరిగి పొందే అవకాశం ఉంటుంది. రైలు బయల్దేరడానికి 72 గంటల కంటే ముందే టికెట్ రద్దు చేస్తే స్వల్ప ఛార్జీలు మినహా మిగతా మొత్తం తిరిగి లభిస్తుంది. 72 నుంచి 24 గంటల మధ్య రద్దు చేస్తే సుమారు 25 శాతం కోత విధిస్తారు. 24 గంటల నుంచి 8 గంటల మధ్య రద్దు చేస్తే 50 శాతం వరకు తగ్గింపు ఉంటుంది. ఇక 8 గంటల లోపు టికెట్ రద్దు చేస్తే ఎలాంటి రిఫండ్ ఇవ్వబడదు.

ఇక ప్రయాణికులకు మరింత సౌకర్యం కల్పించే మరో కీలక మార్పు బోర్డింగ్ స్టేషన్ విషయంలో తీసుకువచ్చారు. కొత్త నిబంధనల ప్రకారం, రైలు బయల్దేరే సమయానికి 30 నిమిషాల ముందు వరకు ప్రయాణికులు తమ బోర్డింగ్ స్టేషన్‌ను మార్చుకునే అవకాశం ఉంటుంది. ఇప్పటివరకు చార్ట్ తయారయ్యే ముందు మాత్రమే ఈ సదుపాయం ఉండేది.

హైదరాబాద్, ఢిల్లీ, ముంబై వంటి పెద్ద నగరాల్లో అనేక రైల్వే స్టేషన్లు ఉండటంతో, ఈ కొత్త నిబంధన ప్రయాణికులకు ఎంతో ఉపయోగపడుతుందని అధికారులు భావిస్తున్నారు. మొత్తం మీద ఈ మార్పులు సాధారణ ప్రయాణికులకు లాభం చేకూర్చడంతో పాటు, దళారుల అక్రమాలకు గట్టి చెక్ వేయనున్నాయని రైల్వే శాఖ ఆశాభావం వ్యక్తం చేసింది.