వారం రోజులుగా మెట్రో పిల్లర్‌పై… చివరికి అర్ధరాత్రి రెస్క్యూ!

మెట్రో పిల్లర్‌పై చిక్కుకున్న పిల్లి… అర్ధరాత్రి రెస్క్యూ ఆపరేషన్‌తో కాపాడిన సిబ్బంది

Kochiలో హృదయాన్ని హత్తుకునే ఘటన చోటుచేసుకుంది. వారం రోజులకు పైగా మెట్రో పిల్లర్‌పై చిక్కుకుని అవస్థలు పడుతున్న పిల్లిని అగ్నిమాపక సిబ్బంది సాహసోపేతంగా రక్షించారు.

Jawaharlal Nehru Stadium Metro Station సమీపంలోని ఎత్తైన మెట్రో పిల్లర్‌పై పిల్లి బిక్కుబిక్కుమంటూ తిరుగుతుండటాన్ని ఆటో డ్రైవర్లు గమనించారు. వెంటనే జంతు సంరక్షణ బృందానికి సమాచారం ఇచ్చారు.

మొదటి ప్రయత్నం విఫలం

మెట్రో సర్వీసులు ముగిసిన తర్వాత విద్యుత్ సరఫరా నిలిపివేసి రెస్క్యూ ఆపరేషన్ చేపట్టినా, పిల్లి భయంతో సందులో దాక్కోవడంతో హైడ్రాలిక్ క్రేన్ అక్కడికి చేరలేదు. రెండో ప్రయత్నంలో కూడా కొద్ది సేపు సేవలను నిలిపినా పిల్లి కనిపించకపోవడంతో ఆ యత్నం ఫలించలేదు.

చివరికి విజయం

అగ్నిమాపక బృందాలు హైడ్రాలిక్ లిఫ్ట్ సహాయంతో మూడో ప్రయత్నంలో పిల్లిని సురక్షితంగా కిందకు దించారు. వారం రోజులుగా తిండి లేక బలహీనంగా మారిన ఆ పిల్లికి వెంటనే ఆహారం అందించారు.

‘సుభాష్’గా వైరల్

ఇటీవల విడుదలైన Manjummel Boys సినిమాలో గుణ కేవ్స్‌లో చిక్కుకున్న పాత్ర పేరు ‘సుభాష్’. అదే పేరును ఆటో డ్రైవర్లు ఈ పిల్లికి పెట్టడంతో సోషల్ మీడియాలో వైరల్ అయ్యింది. “సుభాష్‌ను కాపాడాలి” అంటూ స్థానికులు డిమాండ్ చేయడంతో రెస్క్యూ ఆపరేషన్‌కు మరింత ప్రాధాన్యం లభించింది.

రెస్క్యూ విజయవంతం కావడంతో అక్కడ గుమిగూడిన ప్రజలు ఆనందంతో కేరింతలు కొట్టారు. మెట్రో అధికారుల సహకారంతో ఈ ఆపరేషన్ సక్సెస్ అయ్యిందని అగ్నిమాపక సిబ్బంది తెలిపారు.