‘ఉస్తాద్ భగత్ సింగ్’తో నెరవేరిన రాశీ కల…….

పవర్ స్టార్ పవన్ కల్యాణ్తో కలిసి నటించే అవకాశం దక్కడం తనకు ఎంతో ప్రత్యేకమని నటి రాశీ ఖన్నా వెల్లడించారు. చాలా కాలంగా ఆయనతో పని చేయాలని కోరుకున్న తన కల ‘ఉస్తాద్ భగత్ సింగ్’ చిత్రంతో నెరవేరిందని ఆమె తెలిపారు. సినిమా విడుదలకు ముందు మీడియాతో మాట్లాడిన రాశీ, ఈ ప్రాజెక్ట్ తన కెరీర్‌లో మైలురాయిగా నిలుస్తుందని చెప్పారు.

దర్శకుడు హరీశ్ శంకర్ ఈ అవకాశాన్ని అందించగానే, కథ వివరాలు కూడా అడగకుండా వెంటనే అంగీకరించానని రాశీ చెప్పారు. పవన్ కల్యాణ్‌తో స్క్రీన్ షేర్ చేయాలనే ఆసక్తే తన నిర్ణయానికి ప్రధాన కారణమని ఆమె పేర్కొన్నారు. షూటింగ్ సమయంలో తనకు వచ్చిన అనుభవాలు చాలా ప్రత్యేకమని, ఆయనతో పని చేయడం ఓ లెర్నింగ్ ఎక్స్‌పీరియెన్స్‌గా అనిపించిందని తెలిపారు.

ఈ సినిమాలో తాను ఆధునిక యువతి పాత్రలో కనిపిస్తానని రాశీ వెల్లడించారు. చిత్రంలోని పాటలు, ముఖ్యంగా మాస్ సాంగ్ ప్రేక్షకులను ఆకట్టుకుంటుందని ఆమె నమ్మకం వ్యక్తం చేశారు. షూటింగ్ సమయంలో టైమ్ మేనేజ్‌మెంట్ కోసం ఎంతో కష్టపడ్డానని, కొన్ని సందర్భాల్లో నిరంతరం పనిచేసిన రోజులూ ఉన్నాయని గుర్తుచేసుకున్నారు.

‘ఉస్తాద్ భగత్ సింగ్’ చిత్రం మాస్ ఎలిమెంట్స్‌తో పాటు కుటుంబ ప్రేక్షకులను కూడా ఆకట్టుకునేలా రూపొందిందని ఆమె చెప్పారు. ఈ సినిమాతో ప్రేక్షకులు మళ్లీ పవన్ కల్యాణ్ ప్రత్యేక శైలిని ఆస్వాదిస్తారని రాశీ విశ్వాసం వ్యక్తం చేశారు. ఈ చిత్రంలో శ్రీలీల మరో కథానాయికగా నటిస్తున్నారు.

తెలుగు సినీ రంగంలో ‘ఊహలు గుసగుసలాడే’తో ప్రవేశించిన రాశీ ఖన్నా, తర్వాత వరుస విజయాలతో తనకంటూ గుర్తింపు తెచ్చుకున్నారు. తెలుగు మాత్రమే కాకుండా ఇతర భాషల్లోనూ అవకాశాలు అందుకుంటూ తన ప్రయాణాన్ని విజయవంతంగా కొనసాగిస్తున్నారు.