కల్లాల్లో ధాన్యం దొంగతనం.. 21 ఏళ్ల బీటెక్ యువకుల ముఠా గుట్టురట్టు..

వరంగల్ పోలీస్ కమిషనరేట్ పరిధిలో రైతులను టార్గెట్ చేస్తూ ధాన్యం దొంగతనాలకు పాల్పడుతున్న ఓ యువ ముఠాను పోలీసులు అరెస్ట్ చేశారు. జల్సాల కోసం కొత్త తరహా నేరాలకు తెరతీసిన ఈ ముఠా బీటెక్ విద్యార్థులతో పాటు మరికొందరితో కలిసి పనిచేసినట్లు దర్యాప్తులో తేలింది.

పరకాల ఏసీపీ సతీష్ బాబు తెలిపిన వివరాల ప్రకారం హనుమకొండకు చెందిన ముగ్గురు ఇంజనీరింగ్ విద్యార్థులు ప్రతీక్, అస్లాం, రాహుల్ ఖర్చులకు డబ్బులు కావాలనే ఉద్దేశంతో ఈ దొంగతనాలకు ప్లాన్ చేశారు. రాత్రి వేళల్లో హైవేలు, గ్రామీణ రహదారులపై రైతులు ఆరబెట్టిన ధాన్యాన్ని గమనించి, సరైన సమయం చూసి బస్తాలు ఎత్తుకెళ్లేవారు.

ఈ నేరాల్లో సహకారం కోసం వారు మరికొంత మందిని కూడా రంగంలోకి దింపారు. నేపాల్‌కు చెందిన ముగ్గురు మైనర్లు, ఒక యువతి సహా మొత్తం నలుగురిని ఈ గ్యాంగ్‌లో చేర్చుకున్నట్లు పోలీసులు తెలిపారు. ఖరీదైన అద్దె కార్లను ఉపయోగిస్తూ, సులభంగా గుర్తించకుండా దొంగతనాలు చేసినట్లు గుర్తించారు.

కేవలం 15 రోజుల వ్యవధిలోనే వరంగల్ ప్రాంతంలోని 15 మంది రైతుల వద్ద నుంచి సుమారు 242 ధాన్యం బస్తాలను ఈ ముఠా చోరీ చేసినట్లు వెల్లడైంది. ఈ ఘటనలతో గ్రామాల్లో రైతుల మధ్య అనుమానాలు, ఘర్షణ వాతావరణం కూడా ఏర్పడినట్లు పోలీసులు తెలిపారు.

దొంగిలించిన ధాన్యాన్ని దూర ప్రాంత రైస్ మిల్లులకు తరలించి అమ్మి, వచ్చిన డబ్బును రాహుల్ ఇంట్లో దాచినట్లు దర్యాప్తులో తేలింది. తర్వాత ఆ మొత్తాన్ని పంచుకోవాలని ప్లాన్ చేసినట్లు సమాచారం.

పక్కా సమాచారం ఆధారంగా దాడులు చేసిన పోలీసులు మొత్తం 8 మంది నిందితులను అరెస్ట్ చేసి రిమాండ్‌కు తరలించారు. వారి వద్ద నుంచి రూ.3,05,200 నగదు, రెండు కార్లు, ఆరు మొబైల్ ఫోన్లు స్వాధీనం చేసుకున్నారు. అరెస్టయిన వారంతా 21 ఏళ్ల లోపు వారే కావడం గమనార్హం.