భార్య లావుగా ఉంటే పాపం ఆ భర్త పరిస్తితి ఇంతే

భార్యలు లావుగా ఉండే భర్తలు డయాబెటిస్ బారిన పడే ముప్పు ఎక్కువట. వినడానికి విడ్డూరంగా ఉన్నా ఇది నిజమే. మగువలు ఆహారాన్ని అధికంగా తీసుకోవడానికి ఇష్టపడుతున్నట్లయితే.. వారి భర్తల ఆరోగ్యం ప్రమాదంలో ఉన్నట్లేనని ఓ పరిశోధన వెల్లడించింది. భార్యలు ఒబేసిటీతో బాధపడుతున్నట్లే.. మధ్య వయసు పురుషుల్లో టైప్-2 డయాబెటిస్ వచ్చే ముప్పు అధికమని ఓ అధ్యయనం తెలిపింది. భర్తలు లావుగా ఉన్నప్పటికీ ఆ ప్రభావం భార్యలపై మాత్రం ఉండటం లేదని సదరు అధ్యయనం స్పష్టం చేసింది.

ఆహార అలవాట్లు సరిగా లేకపోవడం, శారీరక శ్రమ సరిగా ఉండకపోవడమే ఇందుకు కారణమని పరిశోధకులు భావిస్తున్నారు. లావుగా ఉన్న మహిళలు తమ భర్తల ఆహార అలవాట్లు, ఇతర కార్యకలాపాలను ప్రభావితం చేస్తున్నారు. భర్తల జీవనశైలి‌పై భార్యల ప్రభావం ఎక్కువగా ఉంటుందని ఈ పరిశోధన తేల్చింది. ఆహారం వండే బాధ్యత ఆడవాళ్లపై ఉండటం లేదంటే వారు తమ గురించి అధికంగా శ్రద్ధ వహిస్తుండటమే ఇందుకు కారణం కావచ్చని పరిశోధకులు భావిస్తున్నారు.

ఆర్హస్ యూనివర్సిటీకి చెందిన ఆడమ్ హల్మన్ ఈ పరిశోధనకు నేతృత్వం వహించారు. పోర్చుగల్‌లో జరిగిన యూరోపియన్ అసోసియేషన్ ఫర్ ది స్టడీ ఆఫ్ డయాబెటిస్‌ వార్షిక సమావేశంలో ఈ ఫలితాలను వెల్లడించారు.