సెకండ్ హ్యాండ్ కారు శుభ్రం చేస్తుండగా.. 9 ఏళ్ళ బాలుడికి వరించిన అదృష్టం!

సాధారణంగా మనం ఏదైనా పని చేస్తున్నప్పుడు ఆ పనికి తగ్గ ప్రతిఫలం ఆశిస్తాము. ఈ క్రమంలోనే ఆ పనికి తగ్గ ఫలితం లభించడంతో పాటు మన పనికి బహుమతులు ప్రకటిస్తే వచ్చే సంతోషం మాటలలో చెప్పలేనిది. అలాంటి సంతోషంలోనే తొమ్మిది సంవత్సరాల బాలుడులాండన్ మెల్విన్ మునిగి తేలుతున్నాడు. ఇంతకీ లాండన్ సంతోషం వెనుక ఉన్న కారణం ఏమిటో ఇక్కడ తెలుసుకుందాం..

అమెరికాలోని ఇండియానాకు చెందిన లాండన్.. తన తండ్రి సెకండ్ హ్యాండ్ కారు శుభ్రం చేస్తున్న సమయంలో ఫ్లోర్ పై ఒక కవర్ పడిపోయింది. ఆ కవర్ చూసిన లాండన్ తనకి ఏదో కొత్త వస్తువు దొరికిందని వెంటనే ఆ కవర్ తీసుకొని తన తండ్రి దగ్గరకు వెళ్లాడు. అయితే తన తండ్రి మైకేల్ మెల్విన్ తన కొడుకు తెచ్చిన ఎన్వలప్ కవర్ ను పెద్దగా పట్టించుకోలేదు. కానీ లాండన్ మాత్రం తన తెచ్చిన కవర్ తెరిచి చూడాలని పదేపదే విసిగిస్తున్నడంతో మైకేల్ చివరికి కవర్ తెరిచి చూసి ఎంతో ఆశ్చర్యం వ్యక్తం చేశాడు.

తన కొడుకు తెచ్చిన ఎన్వలప్ కవర్ లో పెద్ద మొత్తంలో డబ్బు ఉండడం చూసి మైకేల్ ఎంతో ఆశ్చర్యం వ్యక్తం చేస్తూ ఈ విషయాన్ని తన భార్యకు తెలియజేశారు. భార్యభర్తలిద్దరు ఆ కవర్ లో ఉన్న డబ్బులు మొత్తం లెక్కించగా సుమారు ఐదు వేల డాలర్లు అనగా రూ.3.5 లక్షలు ఉన్నట్లు గుర్తించారు. ఈ డబ్బులతో పాటు మరి కొన్ని చెక్ లు కూడా ఉన్నాయి. ఈ విధంగా దొరికిన డబ్బు తమది కాదని భావించిన ఆ దంపతులు ఆ డబ్బులను అసలైన యజమానులకు తిరిగి ఇవ్వాలని నిర్ణయించుకుంది.

మైకేల్ గత ఏడాది సెప్టెంబర్లో ఆ కారును దక్షిణ కారోలినాకు చెందిన ఓ కుటుంబం నుంచి కొనుగోలు చేశారు. 2019లో పాత యజమానులు ఫ్లోరిడాకు ప్రయాణించినప్పుడు ఈ డబ్బును కవర్లో పెట్టి మర్చిపోయినట్లు గుర్తించారు. వెంటనే వారికి సమాచారం అందించి తమ డబ్బును తీసుకోవాల్సిందిగా మైకేల్ తెలియజేశారు. ఎంతో కష్టపడి తమ డబ్బును కనిపెట్టి వెనక్కి ఇస్తుండడంతో యజమానులు లాండన్ 1000 డాలర్లు తీసుకుంటేనే వారు తమ డబ్బులు తీసుకుంటామని చెప్పడంతో లాండన్ ఆనందానికి అవధులు లేకుండా పోయాయి. ఆ డబ్బుతో తనకు నచ్చిన వస్తువులను కొనుక్కోవాలని లాండన్ ఒక జాబితాను తయారు చేశాడు.