కరోనా విషయంలో మరో ముందడుగు.. వైరస్ కట్టడి సాధ్యమే..?

దేశంలో కరోనా మహమ్మారి విలయతాండవం కొనసాగుతోంది. తెలుగు రాష్ట్రాల్లో గతంతో పోలిస్తే కేసుల సంఖ్య తగ్గినా వేల సంఖ్యలో నమోదవుతున్న కేసులు ప్రజలను టెన్షన్ పెడుతున్నాయి. శాస్త్రవేత్తలు కరోనా మహమ్మారిని కట్టడి చేయడానికి వైరస్ పై అనేక పరిశోధనలు జరుపుతున్నారు. ఈ పరిశోధనల్లో కరోనా వైరస్ కు సంబంధించిన కీలక విషయాలు వెలుగులోకి వస్తూ ప్రజలను తీవ్ర భయాందోళనకు గురు చేస్తున్నాయి.

మందులు, వ్యాక్సిన్లు అందుబాటులోకి రాకపోవడంతో ప్రపంచవ్యాప్తంగా ప్రజలు తీవ్ర ఇబ్బందులను ఎదుర్కొంటున్నారు. ఎక్కడ, ఎవరికి, ఏ విధంగా సోకుతుందో తెలియని కరోనా వైరస్ గురించి అనేక పరిశోధనలు చేస్తున్నారు. తాజాగా అమెరికా శాస్త్రవేత్తలు కరోనా వైరస్ విషయంలో మరో ముందడుగు వేశారు. కరోనా ఏ విధంగా మనిషికి ఇన్ఫెక్షన్ కలిగిస్తుందో తెలుసుకునేందుకు ప్రత్యేక సాధనాన్ని తయారు చేశారు.

అమెరికాలోని నేషనల్‌ సెంటర్‌ ఫర్‌ అడ్వాన్సింగ్‌ ట్రాన్స్‌లేషనల్‌ సైన్సెస్‌ శాస్త్రవేత్తలు కొమ్ము ఆకృతిలో స్పైక్‌ ప్రొటీన్లు కరోనా వైరస్ పై ఉన్నట్లు గుర్తించారు. ఈ ప్రోటీన్లు మనుషుల శరీరంలోని ఏసీఈ2 అనే భాగానికి అతుక్కొంటున్నాయని.. ఆ తర్వాత వైరస్ కణంలోకి ప్రవేశిస్తోందని శాస్త్రవేత్తలు తేల్చారు. క్వాంటమ్‌ డాట్‌ అనే ఫ్లోరోసెంట్‌ నానో రేణువు సహాయంలో పరిశోధనలు చేసి ఈ విషయాలను తెలిపారు.

కరోనా వైరస్ మానవ శరీరంలోకి ప్రవేశించిన తరువాత అనేక పనులను నిర్వహిస్తోందని.. మరిన్ని పరిశోధనలు చేసి వైరస్ యొక్క కదలికలను పూర్తిస్థాయిలో గుర్తించాలని పేర్కొన్నారు. క్వాంటమ్ డాట్ నానో రేణువు సహాయంతో చేసిన పరిశోధనల ద్వారా కీలక విషయాలు వెలుగులోకి వచ్చాయని.. త్వరలో మానవ శరీరంలో కరోనా వైరస్ ను కట్టడి చేసేందుకు కొత్త మందును తయారు చేస్తున్నామని.. కరోనాను కట్టడి చేయడం సాధ్యమవుతుందని శాస్త్రవేత్తలు అభిప్రాయపడ్డారు.