నిమ్మకాయలు త్వరగా ఎండిపోతున్నాయా? ఈ సింపుల్ చిట్కాలతో వారాల పాటు ఫ్రెష్‌గా నిల్వ చేసుకోండి!

వేసవి కాలంలో నిమ్మకాయలకు డిమాండ్ భారీగా పెరుగుతుంది. చల్లటి నిమ్మరసం తాగేందుకు చాలామంది ఎక్కువ మొత్తంలో నిమ్మకాయలు కొనుగోలు చేస్తుంటారు. అయితే ఎండల ప్రభావంతో అవి త్వరగా గట్టిపడిపోవడం, రసం తగ్గిపోవడం లేదా నల్లటి మచ్చలు వచ్చి పాడవడం సాధారణ సమస్యగా మారింది. ప్రస్తుతం మార్కెట్‌లో నిమ్మకాయ ధరలు కూడా ఎక్కువగానే ఉండటంతో కొనుగోలు చేసినవి పాడైతే ఇబ్బందిగా మారుతోంది.

అయితే కొన్ని సులభమైన పద్ధతులు పాటిస్తే నిమ్మకాయలను చాలా రోజుల పాటు తాజాగా ఉంచుకోవచ్చు. ఇంట్లోనే చేయగల చిన్న చిట్కాలతో నిమ్మకాయల్లో తేమ నిల్వ ఉండటంతో పాటు రసం కూడా తగ్గకుండా కాపాడుకోవచ్చు.

నిమ్మకాయలను నిల్వ చేసేముందు వాటిపై పలుచగా వంటనూనె రాయడం మంచి పద్ధతిగా చెబుతున్నారు. ఇలా చేయడం వల్ల తొక్కపై రక్షణ పొర ఏర్పడి లోపలి తేమ బయటకు పోకుండా ఉంటుంది. ఆ తర్వాత వాటిని గాలి చొరబడని డబ్బాలో పెట్టి ఫ్రిజ్‌లో ఉంచితే చాలా రోజుల వరకు మెత్తగా ఉంటాయి.

మరో సులభమైన మార్గం పేపర్‌లో చుట్టి నిల్వ చేయడం. ప్రతి నిమ్మకాయను విడివిడిగా టిష్యూ పేపర్ లేదా న్యూస్ పేపర్‌లో చుట్టి ఫ్రిజ్‌లో పెట్టాలి. దీంతో ఫ్రిజ్‌లోని అధిక తేమ నేరుగా నిమ్మకాయలకు తగలకుండా ఉంటుంది. ఫలితంగా అవి త్వరగా పాడయ్యే అవకాశం తగ్గుతుంది.

నీటిలో నిల్వ చేసే పద్ధతి కూడా బాగా ఉపయోగపడుతుంది. గాజు జార్ లేదా డబ్బాలో నీరు నింపి అందులో నిమ్మకాయలను పూర్తిగా ముంచి ఫ్రిజ్‌లో ఉంచాలి. ఇలా చేస్తే నిమ్మకాయలు ఎండిపోకుండా తాజాగా ఉంటాయి. అయితే ప్రతి రెండు లేదా మూడు రోజులకు ఒకసారి నీటిని మార్చడం మంచిది.

ఒకేసారి ఎక్కువ నిమ్మకాయలు కొనుగోలు చేసినప్పుడు వాటి రసాన్ని తీసి ఐస్ క్యూబ్స్ రూపంలో నిల్వ చేయవచ్చు. నిమ్మరసాన్ని ఐస్ ట్రేల్లో పోసి ఫ్రీజర్‌లో పెట్టి, తర్వాత క్యూబ్స్‌ను జిప్‌లాక్ కవర్లలో భద్రపరచాలి. అవసరమైనప్పుడు ఒక్కో క్యూబ్‌ను నీటిలో కలిపి వాడుకోవచ్చు.

పాతకాలం నుంచి వస్తున్న మరో పద్ధతి ఉప్పులో నిల్వ చేయడం. నిమ్మకాయలను ముక్కలుగా కోసి వాటికి ఉప్పు రాసి గాజు సీసాలో భద్రపరిస్తే ఎక్కువకాలం నిల్వ ఉంటాయి. ముఖ్యంగా పచ్చడి తయారీలో ఈ పద్ధతి ఉపయోగపడుతుంది.

ఈ చిన్న చిన్న జాగ్రత్తలు పాటిస్తే నిమ్మకాయలు త్వరగా పాడవకుండా ఉండటమే కాకుండా వేసవి మొత్తం తాజా నిమ్మరసం అందుబాటులో ఉంటుంది. అలాగే డబ్బు కూడా ఆదా అవుతుంది.