Balagam film director Venu : నన్ను చూసి నవ్వినోళ్ల నోర్లు మూయించా…: బలగం సినిమా డైరెక్టర్ వేణు

Balagam film director Venu : కమెడియన్ గా సినిమాల్లో ప్రయాణం మొదలు పెట్టి నేడు తెలుగు ప్రేక్షకుల మనసు హత్తుకునేలా సినిమా తీసిన డైరెక్టర్ వేణు. కమెడియన్ వేణు నుండి డైరెక్టర్ వేణు గారు వరకు తన ప్రయాణం, తాను పడిన కష్టాలు, ఇబ్బందులు, త్యాగాలు అన్నింటినీ ‘బలగం’ సినిమా సక్సెస్ అయ్యాక అందరి ప్రశంసలతో మర్చిపోతున్నానంటూ ఇంటర్వ్యూలలో చెప్పిన వేణు ఎల్దండి తన బలగం సినిమా ప్రయాణం గురించి ఇంటర్వ్యూలో తెలిపారు. సినిమా స్క్రిప్ట్ ను ఎలా తయారు చేసుకుంది, ఎన్ని రోజులు కష్టపడింది వంటి విషయాలను పంచుకున్నారు.

నన్ను చూసి నవ్వారు…

కమెడియన్ వీడు సినిమా డైరెక్టర్ ఏంటి అంటూ చాలా మంది నవ్వుకున్నారు. ఇది ఇపుడే కాదు నేను ‘రుద్రమదేవి’ సినిమాలో బన్నీగారికి సీన్స్ రాసినపుడు అలాగే ‘జై లవకుశ’ సినిమాలో యాక్షన్ సన్నివేశాలను రాసినపుడు కూడా ఎవరూ నమ్మలేదు. నేనే రాశానని తెలిసిన వాళ్ళు మరొకరికి చెప్పినా నమ్మలేదు. కమెడియన్ వేణు కాదులే ఇంకెవరో అయ్యుంటారు అని అన్నారు. అలాంటిది ఇప్పుడు బలగం సినిమా చూసాక ఆందరూ ప్రశంసిస్తుంటే చాలా ఆనందంగా ఉంది.

సినిమా టీం మొత్తం ఆ ప్రశంశలలో మునిగితేలుతున్నాం అంటూ తెలిపారు. సినిమా కథలో చాలా వరకు సన్నివేశాలను తన జీవితంలో జరిగినవే తీసుకున్నట్లు అందుకే అందరినీ ఆకట్టుకున్నాయని అందరూ కనెక్ట్ అవుతున్నారు అంటూ తెలిపారు. తన తండ్రి, పెదనాన్న పెద్దమ్మ మరణం అపుడు జరిగిన సంఘటనలు ఈ సినిమాలో ఉన్నాయని, ఇక మన చుట్టూ ఉన్నవాళ్ళ జీవితంలో కూడా మనం చూసే సంఘటనలను రాసుకున్నానని, ఇక సినిమాలో లోకల్ గా ఉన్న పల్లె వాళ్లను నటింపజేయడం వల్ల మరింత సినిమాకు కనెక్ట్ అయ్యారని తెలిపారు వేణు.