గంటల తరబడి గమ్ నములుతున్నారా..? ముఖం స్లిమ్ కాదు, సమస్యలు పెరిగే ఛాన్స్!

ఈ మధ్యకాలంలో సోషల్ మీడియాలో “షార్ప్ జా లైన్” కోసం చూయింగ్ గమ్ నమలడం ఒక కొత్త ట్రెండ్‌గా మారింది. గంటల తరబడి గమ్ నమిలితే ముఖంలోని కొవ్వు తగ్గి ఫేస్ స్లిమ్‌గా కనిపిస్తుందని చాలామంది నమ్ముతున్నారు. ముఖ్యంగా యువతలో ఈ అలవాటు వేగంగా పెరుగుతోంది. అయితే వైద్య నిపుణులు మాత్రం ఈ ప్రచారంలో నిజం చాలా తక్కువేనని చెబుతున్నారు.

చూయింగ్ గమ్ నమలడం వల్ల దవడ కండరాలు కదలికలో ఉంటాయే కానీ, ముఖంలో పేరుకుపోయిన కొవ్వు కరుగుతుందని చెప్పడానికి ఎలాంటి శాస్త్రీయ ఆధారాలు లేవని నిపుణులు స్పష్టం చేస్తున్నారు. ఒక వ్యక్తి ముఖ ఆకృతి అనేది శరీరంలోని మొత్తం కొవ్వు శాతం, జన్యుపరమైన లక్షణాలు, చర్మ స్థితి వంటి అంశాలపై ఆధారపడి ఉంటుందని వైద్యులు చెబుతున్నారు. కేవలం గమ్ నమలడం వల్లే పదునైన జా లైన్ వస్తుందనుకోవడం అపోహ మాత్రమే అంటున్నారు.

అతిగా చూయింగ్ గమ్ నమలడం వల్ల దవడ కండరాలు అధికంగా పనిచేసి గట్టిపడే అవకాశం ఉంటుంది. దీంతో ముఖం సన్నగా కనిపించాల్సింది పోయి మరింత వెడల్పుగా కనిపించే ప్రమాదం ఉందని హెచ్చరిస్తున్నారు. కొంతమందిలో దవడ భాగంలో వాపు, అసౌకర్యం కూడా కనిపించవచ్చని వైద్యులు చెబుతున్నారు.

నిరంతరం గమ్ నమలడం వల్ల టెంపోరోమాండిబ్యులర్ జాయింట్‌పై ఒత్తిడి పెరుగుతుంది. దీని కారణంగా దవడ నొప్పి, నోరు తెరవడంలో ఇబ్బంది, నమిలేటప్పుడు శబ్దాలు రావడం వంటి సమస్యలు ఎదురయ్యే అవకాశం ఉంది. ఇప్పటికే దవడ నొప్పులు లేదా పళ్లను బిగించి కొరికే అలవాటు ఉన్నవారు ఎక్కువసేపు గమ్ నమలితే సమస్య మరింత తీవ్రమయ్యే ప్రమాదం ఉందని నిపుణులు సూచిస్తున్నారు.

ఖాళీ కడుపుతో చూయింగ్ గమ్ నమలడం కూడా ఆరోగ్యానికి మంచిది కాదని చెబుతున్నారు. గమ్ నమలడం ప్రారంభించగానే శరీరం ఆహారం వస్తోందని భావించి జీర్ణరసాలను విడుదల చేస్తుంది. కానీ ఆహారం లేకపోవడంతో ఆ ఆమ్లాలు కడుపుపై ప్రభావం చూపి ఎసిడిటీ, గ్యాస్, కడుపు ఉబ్బరం వంటి సమస్యలకు దారితీస్తాయి. ఎక్కువసేపు నమలడం వల్ల గాలి లోపలికి వెళ్లి పొట్ట ఉబ్బినట్లు అనిపించే అవకాశం కూడా ఉంటుంది.

చక్కెర కలిగిన చూయింగ్ గమ్స్ వల్ల దంత సమస్యలు వచ్చే ప్రమాదం ఎక్కువగా ఉంటుంది. షుగర్ ఫ్రీ గమ్స్‌లో ఉపయోగించే కొన్ని కృత్రిమ తీపి పదార్థాలు కూడా అధిక మోతాదులో తీసుకుంటే జీర్ణ సమస్యలకు కారణమవుతాయని వైద్యులు చెబుతున్నారు. కొన్ని సందర్భాల్లో విరేచనాలు, కడుపు నొప్పి వంటి ఇబ్బందులు కూడా తలెత్తవచ్చని హెచ్చరిస్తున్నారు.

ముఖ ఆకృతిని ఆరోగ్యకరంగా మెరుగుపరుచుకోవాలంటే సమతుల్య ఆహారం, క్రమమైన వ్యాయామం, సరిపడా నీరు తాగడం వంటి అలవాట్లు ముఖ్యమని నిపుణులు సూచిస్తున్నారు. శరీరంలోని మొత్తం కొవ్వు తగ్గినప్పుడే ముఖంలో కూడా మార్పులు కనిపిస్తాయని చెబుతున్నారు. సోషల్ మీడియాలో వచ్చే ప్రతి ట్రెండ్‌ను నమ్మకుండా, ఆరోగ్యానికి మేలు చేసే పద్ధతులను మాత్రమే అనుసరించడం మంచిదని వైద్యులు సూచిస్తున్నారు.