ఎంపీ మిథున్‌రెడ్డి అరెస్ట్ వారెంట్‌కు కోర్టు నిరాకరణ!

విజయవాడ: ఆంధ్రప్రదేశ్‌లో సంచలనం సృష్టిస్తున్న లిక్కర్ స్కాం కేసులో కీలక పరిణామం చోటుచేసుకుంది. వైఎస్సార్ కాంగ్రెస్ పార్టీ ఎంపీ పీవీ మిథున్ రెడ్డిని అరెస్టు చేసేందుకు అనుమతి ఇవ్వాలని ప్రత్యేక దర్యాప్తు బృందం (సిట్) దాఖలు చేసిన పిటిషన్‌ను ఏసీబీ కోర్టు తిరస్కరించింది.

తాజా సమాచారం ప్రకారం, మిథున్ రెడ్డిని అరెస్టు చేసేందుకు వారెంట్ జారీ చేయాలని సిట్ అధికారులు విజయవాడలోని ఏసీబీ కోర్టును ఆశ్రయించారు. అయితే, సిట్ పిటిషన్‌ను విచారించిన న్యాయస్థానం, అరెస్ట్ వారెంట్ జారీ చేయడానికి నిరాకరించింది.

ఈ పరిణామం లిక్కర్ స్కాం కేసు దర్యాప్తులో సిట్‌కు స్వల్ప ఎదురుదెబ్బగా పరిగణించబడుతోంది. ఇదిలావుండగా, మిథున్ రెడ్డికి ముందస్తు బెయిల్ ఇచ్చేందుకు సుప్రీంకోర్టు ఇటీవల నిరాకరించిన విషయం తెలిసిందే. హైకోర్టులో కూడా ఆయనకు బెయిల్ లభించలేదు. ఈ నేపథ్యంలో, సిట్ అరెస్టుకు రంగం సిద్ధం చేస్తున్న తరుణంలో కోర్టు తాజా నిర్ణయం ప్రాధాన్యతను సంతరించుకుంది.

మిథున్ రెడ్డిపై ఇప్పటికే సిట్ లుక్‌ఔట్ సర్క్యులర్ జారీ చేసింది. కోర్టు వారెంట్ నిరాకరణతో సిట్ తదుపరి చర్యలు ఏమిటనేది ఆసక్తికరంగా మారింది.