Doctor Harsha friend Praveena : చనిపోయే ముందు కాల్ చేసాడు… ముందే వెళ్లిపోయి చాలా బాధపెట్టాడు… క్యాన్సర్ అని చెప్తే జోక్ అనుకున్నా…: డాక్టర్ హర్ష స్నేహితురాలు ప్రవీణ

Doctor Harsha friend Praveena : తన చావుని తానే చిరునవ్వుతో ఆహ్వానించి తన స్నేహితులకు, తల్లిదండ్రులకు మనోధైర్యాన్ని నింపి తుది శ్వాస విడిచిన డాక్టర్ హర్షవర్ధన్ గురించి గత కొద్ది రోజులుగా సోషల్ మీడియాలో వినిపిస్తూనే ఉంది. తాజాగా ఆయన స్నేహాతురాలు ప్రవీణ డాక్టర్ హర్షవర్ధన్ తో తనకున్న అనుబంధాన్ని, తనకు క్యాన్సర్ అని తెలిసినా చిరునవ్వుతో చేసిన యుద్ధం గురించి కన్నీరు పెట్టుకుంటూనే పంచుకున్నారు.

క్యాన్సర్ అని చెప్తే జోక్ అనుకున్నా… వాడి అంత్యక్రియలకు వాడే పిలిచాడు…

ప్రవీణ, డాక్టర్ హర్ష గారు మంచి స్నేహితులు అయితే వారిద్దరూ ఎక్కడా కలిసి చదువుకోలేదు. కేవలం కామన్ ఫ్రెండ్ విజయ్ ద్వారా ఫ్రెండ్స్ అయ్యారు. ఫ్రెండ్స్ తో ఎపుడూ టచ్ లోనే ఉంటూ అన్నీ షేర్ చేసుకునేవాడని తన పెళ్లి కూడా చాలా ఎంజాయ్ చేస్తూ చేసుకున్నాడని, అలా ఇంకెవరినీ చూడలేదంటూ ప్రవీణ తెలిపారు. నన్ను వీణ అని పిలిచేవాడని అలా తను మాత్రమే పిలుస్తాడని, ఇక ఆ పిలుపు వినిపించదని ఎమోషనల్ అయ్యారు ప్రవీణ. తనకు క్యాన్సర్ అని చెప్పినపుడు కూడా మొదట నమ్మలేదు జోక్ చేస్తున్నాడనే అనుకున్నాం. కానీ అది నిజం అని తెలిసాక చాలా ఏడ్చాము.

కలవాలని ఎంత అడిగినా క్యాన్సర్ ట్రీట్మెంట్ లో ఉన్న తాను నన్ను ఇలా మీరు చూడటం ఇష్టం లేదు వద్దు, నన్ను అందగాడిలాగానే గుర్తు పెట్టుకోండి అని చెప్పేవాడు. కానీ చనిపోయే కొద్ది రోజుల ముందు మాత్రం కలుద్దాం ఒకసారి అందరినీ చూడాలి అన్నాడు కానీ అది తీరకుండానే వెళ్ళిపోయాడు. తన చావుకు మమ్మల్ని ముందే పిలిచి అమ్మా నాన్నకు ధైర్యం చెప్పమన్నాడు, వాళ్ళు తట్టుకోలేరు అని చెప్పి వెళ్ళాడు. ఇంత త్వరగా వెళ్ళిపోతాడని అనుకోలేదు అంటూ ఎమోషనల్ అయ్యారు ప్రవీణ. తన మీద ఎవరైనా జాలి చూపిస్తే తనకు నచ్చదు అందుకే క్యాన్సర్ తో అంత బాధపడుతున్నా ఆస్ట్రేలియాలో ఉండిపోయాడు కానీ ఇండియా రాలేదు. అలాగే నవ్వుతూనే ఉన్నాడు చివరి దాకా, తన నవ్వు ఇప్పటికీ మాకు వినిపిస్తుంది అంటూ హర్ష వర్ధన్ గారితో ఉన్న మంచి జ్ఞాపకాలను గుర్తు చేసుకున్నారు ప్రవీణ.