తెలంగాణ నిరుద్యోగులకు గుడ్ న్యూస్.. మరో 9 వేల ఉద్యోగాల భర్తీ..!

తెలంగాణ రాష్ట్రంలో అధికారంలో ఉన్న టీఆర్ఎస్ సర్కార్ నిరుద్యోగులకు వరుస శుభవార్తలు చెబుతోంది. కొన్ని రోజుల క్రితం సీఎం కేసీఆర్ 50,000 ఉద్యోగాల భర్తీ చేయబోతున్నట్టు కీలక ప్రకటన చేయగా ఇప్పటికే ఆ దిశగా అడుగులు పడుతున్నాయి. ప్రభుత్వ ప్రధాన కార్యదర్శి సోమేష్ కుమార్ ఉద్యోగాల భర్తీకి సంబంధించిన కార్యాచరణను మొదలుపెట్టామని ఒక్క సంతకంతో 50 వేల ఉద్యోగాల భర్తీకి ఆమోదం తెలపనున్నామని వెల్లడించారు.

అయితే ఈ ఉద్యోగాలతో పాటు మరో 9,000 ఉద్యోగాల భర్తీ కోసం తెలంగాణ సర్కార్ సిద్ధమవుతోంది. ప్రభుత్వ శాఖల్లోని ఖాళీలను భర్తీ చేయడంతో పాటు ప్రభుత్వ రంగ సంస్థలైన కార్పొరేషన్లలో, సహకార సంస్థలైన సొసైటీల్లో ఉద్యోగాల భర్తీ చేయడానికి తెలంగాణ సర్కార్ సిద్ధమవుతోంది. అన్ని శాఖల కార్యదర్శులకు ఉద్యోగ ఖాళీలకు సంబంధించిన సమాచారం ఇవ్వాలని ఇప్పటికే ఆదేశాలు అందాయి.

ప్రభుత్వం తీసుకున్న తాజా నిర్ణయం వల్ల 50,000 ఉద్యోగాలతో పాటు మరో 9,000 ఉద్యోగాలకు కొత్తగా నోటిఫికేషన్ విడుదల కానుందని తెలుస్తోంది. రాష్ట్రంలో సొసైటీలు, సంస్థలు మొత్తం 190 ఉండగా వీటిలో భారీ సంఖ్యలో ఖాళీలు ఉన్నాయి. సీఎం కేసీఆర్ రాష్ట్రంలో ఉద్యోగాల భర్తీ జరిగి రెండు సంవత్సరాలు కావడంతో నోటిఫికేషన్ల ద్వారా నిరుద్యోగులకు ప్రయోజనం చేకూర్చాలని భావిస్తున్నారు.

దుబ్బాక, గ్రేటర్ ఎన్నికల ఫలితాలు సైతం ఉద్యోగ నోటిఫికేషన్లు విడుదల కావడానికి పరోక్షంగా కారణమవుతున్నాయని తెలుస్తోంది. మరోవైపు తక్కువ వేతనాలతో కాంట్రాక్ పై పని చేస్తున్న ఉద్యోగులు పర్మినెంట్ అవుతారో లేదో చూడాల్సి ఉంది. ప్రభుత్వం కాంట్రాక్ట్ ఉద్యోగులను పర్మినెంట్ చేస్తే బాగుంటుందని కాంట్రాక్ట్ ఉద్యోగులు అభిప్రాయం వ్యక్తం చేస్తున్నారు.