తప్పుడు ప్రచారం చేస్తే చెప్పు తెగుద్ది.. సీతక్క ఫైర్

తెలంగాణ రాజకీయాల్లో అంగన్‌వాడీ ఫోన్ల కొనుగోలు వ్యవహారం వివాదాస్పదంగా మారింది. రాష్ట్ర స్త్రీ, శిశు సంక్షేమ శాఖ మంత్రి సీతక్క ప్రభుత్వంపై వస్తున్న అవినీతి ఆరోపణలను తీవ్రంగా ఖండించారు. అంగన్‌వాడీ సిబ్బందికి అందించిన మొబైల్ ఫోన్ల కొనుగోలులో ఎలాంటి అక్రమాలు జరగలేదని స్పష్టం చేశారు.

ములుగు జిల్లాలో జరిగిన సమావేశంలో మాట్లాడిన ఆమె, ఒక్కో ఫోన్‌ను రూ.11,650కే కొనుగోలు చేశామని తెలిపారు. కానీ కొందరు ఉద్దేశపూర్వకంగా ధరలను పెంచి చూపిస్తూ తప్పుడు ప్రచారం చేస్తున్నారని ఆరోపించారు. ఈ విషయంలో ఎవరికైనా ఆధారాలు ఉంటే బయటపెట్టాలని సవాల్ విసిరారు. అవసరమైతే మేడారం పనులపై సీబీఐ దర్యాప్తుకూ సిద్ధమని వెల్లడించారు.

ఇదిలా ఉండగా, ప్రతిపక్ష బీఆర్ఎస్ నేతలు మాత్రం ఈ వ్యవహారంపై తీవ్ర ఆరోపణలు చేస్తున్నారు. టెండర్ ప్రక్రియలో అక్రమాలు జరిగాయని, ఫోన్ల కొనుగోలులో భారీ వ్యత్యాసం ఉందని వారు విమర్శిస్తున్నారు. ఈ అంశంపై పరస్పర ఆరోపణలు పెరుగుతుండటంతో రాష్ట్ర రాజకీయాలు మరింత వేడెక్కుతున్నాయి.

ప్రభుత్వ పథకాలపై అసత్య ప్రచారం చేస్తే కఠినంగా ఎదుర్కొంటామని మంత్రి సీతక్క హెచ్చరించారు. ప్రస్తుతం ఈ వివాదం రాజకీయ వర్గాల్లో చర్చనీయాంశంగా మారింది.