ఎన్టీఆర్ కు మనవరాలిగా తర్వాత ఆయనకు జోడిగా నటించిన హీరోయిన్ ఎవరో మీకు తెలుసా.?!

తెలుగు సినీ పరిశ్రమలో విశ్వవిఖ్యాత నటసార్వభౌముడు ఎన్టీ.రామారావు ధరించిన పాత్రలు కోకొల్లలు. పౌరాణిక జానపద సాంఘిక చిత్రాలు ఏవైనా తన పాత్రలతో ఆ సినిమాకి పేరు తెచ్చేవారు. ఆయన ఎంతోమంది హీరోయిన్స్ తో నటించారు. సావిత్రి, జమున, షావుకారు జానకి, కృష్ణకుమారి, అంజలి, రాజశ్రీ, వాణిశ్రీ, జయసుధ, జయప్రద, లక్ష్మి, మంజుల, సుజాత లాంటి ఎంతో మంది హీరోయిన్స్ తో ఆయన జత కట్టారు.

అలాగే ఎన్టీ.రామారావుకి కూతురిగా మనవరాలిగా నటించి తిరిగి ఆయన ప్రక్కన జోడీగా చేసిన వారు అందాలతార శ్రీదేవి గా చెప్పుకోవచ్చు. 1972, త్రివేణి ప్రొడక్షన్స్, పి.చంద్రశేఖర్ రెడ్డి దర్శకత్వంలో ‘బడి పంతులు’ చిత్రం విడుదలయ్యింది. ఈ సినిమాలో ఎన్టీరామారావు, అంజలి ప్రధాన పాత్రలో నటించారు. కృష్ణంరాజు, విజయ లలిత, రామకృష్ణ, జగ్గయ్య, నాగభూషణం ఇతర పాత్రల్లో కనిపించారు. అయితే ఈ సినిమాలో ఎన్టీ.రామారావుకి మనవరాలిగా శ్రీదేవి నటించారు. ఈ సినిమా బాక్సాఫీస్ వద్ద మంచి విజయాన్ని సాధించింది. ఆ తర్వాత శ్రీదేవి తెలుగు, తమిళ చిత్రాల్లో చైల్డ్ ఆర్టిస్ట్ గా రాణించారు. తెలుగులో ‘అనురాగాలు’ చిత్రంతో హీరోయిన్ గా పరిచయమైన శ్రీదేవి.. బంగారక్క, ఆ తర్వాత చేసిన ‘పదహారేళ్ళ వయసు’ చిత్రంతో ఆమె పూర్తి స్థాయి హీరోయిన్ గా రాణించారు.

ఆ తర్వాత ఏడు సంవత్సరాల వ్యవధిలో తిరిగి ‌1979లో రోజామూవీస్, కె రాఘవేంద్రరావు దర్శకత్వంలో ‘వేటగాడు’ చిత్రం విడుదలైంది. ఈ సినిమాలో ఎన్.టి రామారావు, శ్రీదేవి హీరో హీరోయిన్లుగా నటించారు. పూర్తిగా కమర్షియల్ హంగులతో వచ్చిన ఈ చిత్రం బాక్సాఫీస్ వద్ద ఘన విజయాన్ని సాధించింది. ఆ రోజుల్లో మనవరాలి వయసున్న శ్రీదేవితో ఎన్టీఆర్ చిందులు వేయడం ఏమిటని.. రూమర్స్ వచ్చినప్పటికీ అవి ఏవి పట్టించుకోకుండా, దర్శకుడు రాఘవేంద్రరావు.. ఎన్టీరామారావు, శ్రీదేవి తో “ఆకు చాటు పిందె తడిసే..కొమ్మ చాటు పువ్వు తడిసే..” లాంటి డ్యూయెట్ సాంగ్ పెట్టారు. ఈ పాట ఆ రోజుల్లో కుర్రాళ్లకు నిద్ర లేకుండా చేసింది. చక్రవర్తి అందించిన బాణీలు ‘వేటగాడు’ చిత్రాన్ని విజయపథం వైపు నడిపించాయనడంలో ఏమాత్రం సందేహం లేదు.