హిందీ షోలే సినిమా రికార్డును బద్దలు కొట్టిన ఆనాటి ఎన్టీఆర్ సినిమా ఏమిటో తెలుసా…!!

విశ్వవిఖ్యాత నటసార్వభౌమ నందమూరి తారక రామారావు 1977 ఒక మరపురాని సంవత్సరంగా పరిగణించవచ్చు. ఒకే సంవత్సరంలో హ్యాట్రిక్ బ్లాక్ బస్టర్స్ ఇచ్చిన ఈ 1977 సంవత్సరాన్ని ఎన్టీఆర్ తన సినీ చరిత్రలో సువర్ణాక్షరాలతో లిఖించవలసిన సందర్భం. ఈ సంవత్సరం ప్రారంభంలో పౌరాణిక చిత్రం దాన వీర శూర కర్ణ తరవాత సాంఘిక చిత్రం అడవి రాముడు ఆ తర్వాత సోషియో ఫాంటసీ చిత్రం యమగోల చిత్రాలతో అద్భుతమైన ఆశ్చర్యకరమైన విజయాలను ఎన్టీ రామారావు తన ఖాతాలో వేసుకున్నారు.

సోదరులైన నెక్కంటి వీరవెంకట సత్యనారాయణ ఆరుమళ్లీ సూర్యనారాయణ వీరిద్దరూ 1971 ప్రాంతంలో మద్రాస్ వచ్చి సత్య చిత్ర బ్యానర్ స్థాపించి అప్పటికే రెండు ఫ్లాపు సినిమాలు తీసి ఉన్నారు. అలా 1976 ప్రాంతంలో ఈ ఇద్దరూ సోదరులు ఎన్టీ రామారావు గారి డేట్స్ ఎలాగో సంపాదించారు. అంతకుముందే తమ సినిమాలకి అసిస్టెంట్ డైరెక్టర్ గా చేసిన రాఘవేంద్ర రావు గారిని ఈ సినిమాకి దర్శకుడుగా ఎన్నుకున్నారు. అప్పటికి రాఘవేంద్రరావుకి ఒకే ఒక సినిమా తీసిన అనుభవం ఉంది.

కన్నడంలో హీరో రాజ్ కుమార్ ఒక అడవి నేపథ్యంలో తీసిన సినిమా ఘన విజయం సాధించడంతో అలాంటి ఫారెస్ట్ బ్యాక్ డ్రాప్ లో ఒక సినిమా తీయాలనుకున్నారు. సిరి సిరి మువ్వ చిత్రానికి పని చేసిన రచయిత జంధ్యాలను ఈ సినిమాకి ఎంపిక చేసుకున్నారు. 1977 కంటే ముందు సీనియర్ హీరోయిన్ల తో చేసిన ఎన్టీఆర్ వయస్సు తగ్గించాడానికి జయప్రద, జయసుధ లను హీరోయిన్స్ గా ఎన్నుకున్నారు.
ఈ సంవత్సరము ప్రథమార్థంలో ప్రారంభమైన దానవీరశూరకర్ణ చిత్రం పూర్తయిన తర్వాత దాదాపు ఏకధాటిగా 35 రోజుల డేట్స్ ని సత్య చిత్ర బ్యానర్ కి ఎన్టీ.రామారావు ఇవ్వడం జరిగింది. ఈ సినిమా షూటింగును తమిళనాడు, కర్ణాటక సరిహద్దు అడవుల్లో చిత్రీకరించడం జరిగింది. తమ షూటింగ్ అవసరాల నిమిత్తం ఈ అడవి నుంచి 150 కిలోమీటర్లు వెళితే గాని మైసూరు పట్టణం వచ్చేది కాదు. ప్రభుత్వ అనుమతి పొంది అక్కడ తాత్కాలికంగా విద్యుత్తును, సెట్స్ తో కూడిన ఇళ్లను ఏర్పాటు చేసుకోవడం జరిగింది.

అడవి నేపథ్యంలో కొనసాగే కథ కాబట్టి చెన్నైలోని సర్కస్ కంపెనీ నుంచి మూడు, నాలుగు ఏనుగులను తెప్పించడం జరిగింది. షూటింగ్ సందర్భంలో జయసుధ, జయప్రద లు ప్రయాణిస్తున్న ఎడ్లబండి యొక్క చక్రపు ఇరుసు పడిపోవడంతో జయప్రదకు పక్కటెముకలు విరగడంతో కొంత విశ్రాంతి తీసుకొని తిరిగి షూటింగ్లో పాల్గొనడం జరిగింది. అడవి రాముడు క్లైమాక్స్ లో జయసుధ, జయప్రద ఏనుగు మీద వెళుతున్నప్పుడు షూటింగ్ లో పాల్గొన్న జూనియర్ ఆర్టిస్టులు కేకలు వేయడంతో ఏనుగు వీరిని కింద పడేసి పరుగులు పెట్టింది. అలా అనేక ఇబ్బందులతో ఈ సినిమాని 1977 ఏప్రిల్ నెలలో విడుదల చేశారు.

అడవి రాముడు విడుదలైన తర్వాత ఆ సినిమా సృష్టించిన రికార్డ్స్ నభూతో న భవిష్యత్ అని చెప్పవచ్చు. అప్పటివరకూ సినిమాలు శతదినోత్సవం జరుపుకోవడం అనేది ఒకే థియేటర్లో 80 రోజులు నాలుగు షోలు నడిస్తే మిగతా 20 రోజులు మూడు షో లు ఇలా వంద రోజులు పూర్తి చేస్తే ఆ సినిమా హిట్టు గా చెప్పుకోవడం జరిగేది. కానీ అడవి రాముడు 120 రోజులు ఐదు షోలతో ఒకే థియేటర్లో ప్రదర్శింపబడింది. అలానే దేశం గర్వించదగ్గ చిత్రము షోలే మహారాష్ట్రలో కేవలం మూడు ధియేటర్ లో మాత్రమే 365 రోజులు ఆడింది. కానీ అడవి రాముడు నాలుగు థియేటర్లలో ఒక సంవత్సర కాలం ఆడడంతో షోలే చిత్రాన్ని కూడా అడవి రాముడు దాటేసిందని చెప్పవచ్చు.