IPL 2025 Final : కోహ్లీ కలను నిజం చేస్తాడా? రజత్ పాటిదార్ ఆసక్తికర వ్యాఖ్యలు!

IPL 2025 Final :అహ్మదాబాద్‌లోని నరేంద్ర మోదీ స్టేడియం వేదికగా IPL 2025 ఫైనల్ మ్యాచ్ జరగనుంది. రాయల్ ఛాలెంజర్స్ బెంగళూరు (RCB), పంజాబ్ కింగ్స్ (PBKS) జట్లు ఈ టైటిల్ కోసం పోటీ పడుతున్నాయి. ఇరు జట్లు కూడా ఇప్పటి వరకు ఒక్కసారి కూడా కప్పు గెలవలేదు. దీంతో ఈ మ్యాచ్‌లో గెలుపు కోసం హోరాహోరీగా తలపడనున్నాయి. సాయంత్రం 7.30 గంటలకు మ్యాచ్ ప్రారంభం కానుంది.

మ్యాచ్ ప్రారంభానికి ముందు ఆర్సీబీ కెప్టెన్ రజత్ పాటిదార్ మీడియాతో మాట్లాడాడు. విరాట్ కోహ్లీ గురించి మాట్లాడుతూ.. “కోహ్లీ గత కొన్నేళ్లుగా ఆర్సీబీకి టైటిల్ అందించడానికి ఎంతో కష్టపడ్డాడు. అతని కలను నెరవేర్చే సమయం వచ్చింది. ఆర్సీబీ గెలవడం కోహ్లీకి, అభిమానులకు చాలా ముఖ్యం. ఈ ట్రోఫీని కోహ్లీ కోసం గెలవడానికి ప్రయత్నిస్తాం” అని అన్నాడు.

పాటిదార్ ఇంకా మాట్లాడుతూ.. “మా జట్టులోని ఆటగాళ్లు గెలుపు ఓటముల గురించి పెద్దగా ఆలోచించకుండా, తమ ఆటపైనే దృష్టి పెడతారు. ఫైనల్‌లో ఆడుతున్నప్పుడు అంచనాలు ఎక్కువగానే ఉంటాయి. కానీ, నేను నా నియంత్రణలో ఉన్న వాటిపైనే దృష్టి పెడతాను. కెప్టెన్‌గా ఇది నాకు గొప్ప అనుభవం. జట్టులో దిగ్గజ ఆటగాళ్లు, విదేశీ ఆటగాళ్లతో కలిసి ఉండటం నా ఆత్మవిశ్వాసాన్ని పెంచుతుంది” అని చెప్పాడు.

టిమ్ డేవిడ్ ఫిట్‌నెస్ గురించి అప్‌డేట్ ఇస్తూ.. “డేవిడ్ ఆడే విషయంపై చివరి నిమిషంలో నిర్ణయం తీసుకుంటాం. అతను త్వరగా కోలుకుంటాడని ఆశిస్తున్నాను” అని పాటిదార్ తెలిపాడు.

ఆర్సీబీ అభిమానులు 18 ఏళ్లుగా టైటిల్ కోసం ఎదురు చూస్తున్నారు. విరాట్ కోహ్లీ 2008 నుంచి ఆర్సీబీతోనే ఉన్నాడు. 2013 నుంచి 2021 వరకు జట్టుకు కెప్టెన్‌గా కూడా వ్యవహరించాడు. ఆర్సీబీ 2009, 2011, 2016 సీజన్లలో ఫైనల్స్‌కు చేరినా, టైటిల్ మాత్రం గెలవలేకపోయింది.

ఈ సీజన్‌లో ఆర్సీబీ, పంజాబ్ కింగ్స్ జట్లు మూడుసార్లు తలపడ్డాయి. లీగ్ దశలో ఒక మ్యాచ్‌లో ఆర్సీబీ, మరో మ్యాచ్‌లో పంజాబ్ గెలిచాయి. క్వాలిఫైయర్‌లో పంజాబ్‌పై ఆర్సీబీ విజయం సాధించింది. ఇప్పుడు ఫైనల్ మ్యాచ్‌లో ఇరు జట్లు టైటిల్ కోసం మరోసారి పోటీ పడనున్నాయి.