బయట బాగుంటే సరిపోదు.. పుచ్చకాయ తీయగా ఉందో లేదో ఇలా తెలుసుకోండి..

వేసవి వేడి పెరిగేకొద్దీ పుచ్చకాయకు డిమాండ్ కూడా పెరుగుతోంది. చల్లగా, రసపుష్టిగా ఉండే ఈ పండు ఎండల నుంచి ఉపశమనం ఇస్తుంది. కానీ బయటకి బాగానే కనిపించినా, ఇంటికి తీసుకెళ్లాక రుచిలేకపోతే నిరాశ తప్పదు. అందుకే పుచ్చకాయ కొనేటప్పుడు కొన్ని చిన్న చిట్కాలు తెలుసుకుంటే సరైన ఎంపిక చేసుకోవచ్చు.

మొదటగా పండుపై ఉండే పసుపు మచ్చను గమనించాలి. పుచ్చకాయను తిప్పి చూస్తే ఒక వైపు మచ్చ కనిపిస్తుంది. ఇది ముదురు పసుపు లేదా క్రీమ్ రంగులో ఉంటే పండు చెట్టుపైనే బాగా పండిందని అర్థం. అదే తెల్లగా ఉంటే అది పూర్తిగా పండకముందే కోసినదని అర్థం.

తర్వాత బరువును చెక్ చేయాలి. పుచ్చకాయను చేత్తో ఎత్తినప్పుడు అది పరిమాణానికి మించి బరువుగా అనిపించాలి. అంటే అందులో నీరు, తీపి ఎక్కువగా ఉన్నట్టు భావించవచ్చు. తక్కువ బరువుగా ఉంటే అది లోపల ఎండిపోయి ఉండే అవకాశం ఉంది.

మరొక ముఖ్యమైన సూచన శబ్దం. పండును మీ వేళ్లతో తట్టి చూడండి. లోపల ఖాళీగా ఉన్నట్టుగా ప్రతిధ్వనించే శబ్దం వస్తే అది బాగా పండినదని అర్థం. మందమైన, మొద్దుబారిన శబ్దం వస్తే అది ఇంకా పచ్చిగా ఉండే అవకాశముంది.

పండుఆకారం కూడా గమనించాల్సిందే. సరిగ్గా గుండ్రంగా లేదా సమానంగా ఉండే పుచ్చకాయలను ఎంచుకోవడం మంచిది. వంకరగా, అసమానంగా ఉన్న పండ్లు సరైన పెరుగుదల పొందలేదని సూచిస్తాయి. అలాగే పండుపై గాఢమైన ఆకుపచ్చ చారలు స్పష్టంగా ఉండాలి.

చివరగా తొడిమను పరిశీలించండి. పుచ్చకాయకు ఉన్న తొడిమ ఎండిపోయి ఉంటే అది పండినదని భావించవచ్చు. కానీ అది ఇంకా ఆకుపచ్చగా, తాజాగా ఉంటే పండు పూర్తిగా పక్వానికి రాలేదని అర్థం.

ఈ చిన్న చిట్కాలు పాటిస్తే మీరు కొనుగోలు చేసే పుచ్చకాయ తప్పకుండా తీయగా, రుచిగా ఉంటుంది. వేసవి కాలంలో సరైన పండును ఎంచుకుని ఆరోగ్యంగా, ఆనందంగా ఉండండి