సల్మాన్ ఖాన్ కొత్త సినిమా.. దిల్ రాజు, వంశీ పైడిపల్లితో భారీ ప్రాజెక్ట్..!

బాలీవుడ్ స్టార్ హీరో సల్మాన్ ఖాన్ తన అభిమానులకు ఒకేసారి రెండు శుభవార్తలు అందించారు. ఒకవైపు కొత్త సినిమా ప్రాజెక్ట్‌ను ప్రకటిస్తూనే, మరోవైపు తన తండ్రి ఆరోగ్యం గురించి కూడా మంచి సమాచారం పంచుకున్నారు.

తాజాగా సోషల్ మీడియా వేదికగా సల్మాన్ ఖాన్ చేసిన ప్రకటన సినీ వర్గాల్లో ఆసక్తిని రేకెత్తిస్తోంది. టాలీవుడ్ ప్రముఖ నిర్మాత దిల్ రాజు, దర్శకుడు వంశీ పైడిపల్లిలతో కలిసి ఒక భారీ చిత్రాన్ని చేయబోతున్నట్లు ఆయన వెల్లడించారు. “దిల్, దిమాగ్, జిగర్‌తో ఈ ఏప్రిల్ నుంచి కొత్త ప్రయాణం మొదలు” అనే క్యాప్షన్‌తో ఈ ప్రాజెక్ట్‌పై హింట్ ఇచ్చారు.

ఈ సినిమా పూర్తి వివరాలు ఇంకా బయటకు రాలేదు. అయితే, ఇది పాన్ ఇండియా స్థాయిలో రూపొందే భారీ ఎంటర్‌టైనర్‌గా ఉండబోతుందని సినీ వర్గాల్లో చర్చ సాగుతోంది. దేశవ్యాప్తంగా పలు ప్రదేశాల్లో చిత్రీకరణ జరిపేలా ప్లాన్ చేస్తున్నట్లు సమాచారం. విడుదల విషయంలో 2027 ఈద్‌ను లక్ష్యంగా పెట్టుకున్నట్లు ప్రచారం జరుగుతోంది.

ప్రస్తుతం సల్మాన్ ఖాన్ ‘మాతృభూమి’ అనే యుద్ధ నేపథ్యంలో తెరకెక్కుతున్న సినిమాలో నటిస్తున్నారు. ఈ చిత్రానికి అపూర్వ లఖియా దర్శకత్వం వహిస్తున్నారు. ఇందులో చిత్రాంగద సింగ్ కథానాయికగా నటిస్తోంది. త్వరలో ఈ సినిమా ప్రేక్షకుల ముందుకు రానుంది.

ఇదిలా ఉండగా, వ్యక్తిగత జీవితానికి సంబంధించిన విషయాన్ని కూడా సల్మాన్ అభిమానులతో పంచుకున్నారు. ఇటీవల అనారోగ్యంతో ఆసుపత్రిలో చేరిన ఆయన తండ్రి సలీం ఖాన్ ఇప్పుడు కోలుకుని ఇంటికి చేరినట్లు తెలిపారు. ఈద్ సందర్భంగా కుటుంబ సభ్యులతో కలిసి అభిమానులకు అభివాదం తెలియజేస్తూ ఆయన వీడియోను షేర్ చేశారు.

సలీం ఖాన్ భారతీయ సినీ చరిత్రలో ప్రముఖ కథా రచయితగా గుర్తింపు పొందారు. జావేద్ అక్తర్తో కలిసి ‘సలీం-జావేద్’గా అనేక బ్లాక్‌బస్టర్ చిత్రాలకు కథలు అందించారు.

ఇప్పటికే భారీ అంచనాలు నెలకొన్న ఈ కొత్త ప్రాజెక్ట్‌పై మరిన్ని వివరాలు ఎప్పుడు బయటకు వస్తాయా అని అభిమానులు ఆసక్తిగా ఎదురుచూస్తున్నారు.