గుంటూరులో విషాదం.. కూతురితో కలిసి తల్లిదండ్రుల ఆత్మహత్య

ఆంధ్రప్రదేశ్‌లోని గుంటూరు జిల్లాలో హృదయ విదారక ఘటన వెలుగులోకి వచ్చింది. చిన్నారి ఆరోగ్యం మెరుగుపడకపోవడంతో తీవ్ర మనోవేదనకు గురైన తల్లిదండ్రులు, చివరికి కూతురితో కలిసి ప్రాణాలు తీసుకోవడం స్థానికంగా తీవ్ర విషాదాన్ని మిగిల్చింది.

పోలీసుల వివరాల ప్రకారం, నాదెండ్ల మండలం సాతులూరు గ్రామానికి చెందిన గోపి, శంకరకుమారి దంపతులు ప్రేమ వివాహం చేసుకుని జీవిస్తున్నారు. గోపి ఎయిమ్స్ భోపాల్లో వైద్యుడిగా పనిచేస్తున్నారు. వీరికి మూడేళ్ల పాప ఉంది. అయితే ఆ చిన్నారి మానసిక, శారీరక అభివృద్ధి సరిగా లేకపోవడంతో, చికిత్స కోసం తల్లిదండ్రులు ఎన్నో ఆసుపత్రులు తిరిగినట్లు తెలిసింది.

చిన్నారి ఆరోగ్యం మెరుగుపడకపోవడం, చికిత్సలు ఫలితం ఇవ్వకపోవడం గోపి, శంకరకుమారిని తీవ్రంగా కలచివేసింది. ఈ నేపథ్యంలో వారు తీవ్ర నిరాశలోకి జారుకుని ఆత్మహత్యకు పాల్పడాలని నిర్ణయించుకున్నట్లు పోలీసులు గుర్తించారు.

ఇటీవల గోపి భోపాల్ నుంచి ఇంటికి వచ్చి కుటుంబంతో కలిసి బయటకు వెళ్లినట్లు సమాచారం. అనంతరం ఒక లాడ్జ్‌లో ముగ్గురూ మత్తు ఇంజెక్షన్లు తీసుకుని ఆత్మహత్యాయత్నానికి పాల్పడ్డారు. ఈ ఘటనలో శంకరకుమారి, చిన్నారి అక్కడికక్కడే మృతి చెందగా, గోపి ఆసుపత్రిలో చికిత్స పొందుతూ చివరకు ప్రాణాలు కోల్పోయాడు.

దర్యాప్తులో భాగంగా వారి ఫోన్‌లను పరిశీలించిన పోలీసులు, ఈ ఘటనకు ముందు వారిద్దరి మధ్య జరిగిన సందేశాలను గుర్తించారు. కుటుంబం మొత్తం కలిసి చనిపోవాలనే నిర్ణయం ముందుగానే తీసుకున్నట్లు తెలుస్తోంది. ఈ విషయాలు బయటపడటంతో కేసు మరింత విషాదకరంగా మారింది.

ఈ ఘటనతో సాతులూరు గ్రామం శోకసంద్రంగా మారింది. ఒకే కుటుంబానికి చెందిన ముగ్గురు ఇలా ప్రాణాలు కోల్పోవడంతో స్థానికులు తీవ్రంగా కలత చెందుతున్నారు. పోలీసులు కేసు నమోదు చేసి పూర్తి స్థాయి దర్యాప్తు కొనసాగిస్తున్నారు.

ఇలాంటి పరిస్థితుల్లో మానసిక ఒత్తిడిని ఒంటరిగా భరించకుండా, కుటుంబ సభ్యులు, వైద్యులు లేదా కౌన్సిలర్లతో మాట్లాడడం చాలా ముఖ్యమని నిపుణులు సూచిస్తున్నారు. సమస్యలు ఎంత క్లిష్టమైనా పరిష్కార మార్గాలు ఉంటాయని, ఆత్మహత్య ఎప్పటికీ పరిష్కారం కాదని చెబుతున్నారు.