కేరళ సీఎంకు లేఖ.. మోనాలిసా కేసులో కొత్త ట్విస్ట్

‘కుంభమేళా వైరల్ స్టార్’గా గుర్తింపు పొందిన మోనాలిసా భోస్లే వివాదం కొత్త మలుపు తిరిగింది. తనను బలవంతంగా స్వగ్రామానికి తీసుకెళ్లే ప్రయత్నాలు జరుగుతున్నాయని ఆందోళన వ్యక్తం చేస్తూ, రక్షణ కల్పించాలని ఆమె కేరళ ముఖ్యమంత్రి పినరయి విజయన్కు లేఖ రాసింది. తాను మైనర్ కాదని, 18 ఏళ్లు పూర్తి చేసుకున్న మేజర్‌నని ఆ లేఖలో స్పష్టం చేసింది.

ఈ ఘటన మధ్యప్రదేశ్ పోలీసు బృందం విచారణ నిమిత్తం కొచ్చికి చేరుకున్న సమయంలో చోటుచేసుకోవడం గమనార్హం. మోనాలిసా, ఆమె భర్త ఫర్మాన్ ఖాన్‌పై నమోదైన పోక్సో కేసులో భాగంగా వారి వాంగ్మూలాలు నమోదు చేయడానికి పోలీసులు వచ్చారు. అయితే, తమ వివాహ సమయంలో ఆమె మైనర్ అని ఆరోపణలు రావడంతో ఈ కేసు సంక్లిష్టమైంది.

మరోవైపు మోనాలిసా తల్లి తన కుమార్తె ఇంకా పూర్ణవయసు చేరలేదని వాదిస్తోంది. జనన తేదీకి సంబంధించిన పత్రాలు, ఆసుపత్రి రికార్డులు కూడా అదే విషయాన్ని సూచిస్తున్నాయని ఆమె పేర్కొంటోంది. వివాహం కోసం తప్పుడు ధృవీకరణ పత్రాలు ఉపయోగించారని కూడా ఆరోపించింది.

ఈ వివాదం రాజకీయ రంగు కూడా దాల్చింది. కేరళలో అధికార, ప్రతిపక్ష పార్టీల మధ్య మాటల యుద్ధానికి దారితీసింది. వివాహం వెనుక రాజకీయ నేతల ప్రమేయం ఉందని ఆరోపణలు వెల్లువెత్తగా, వాటిని సంబంధిత పార్టీలు ఖండిస్తున్నాయి.

ప్రస్తుతం ఈ కేసు రెండు రాష్ట్రాల మధ్య చట్టపరమైన, రాజకీయ అంశాల మేళవింపుగా మారింది. ఒకవైపు మోనాలిసా తాను మేజర్‌నని చెబుతుండగా, కుటుంబం, అధికారులు మాత్రం ఆమె మైనర్ అని వాదించడం విచారణను మరింత క్లిష్టతరం చేస్తోంది. ఈ కేసులో తదుపరి పరిణామాలు ఎలా ఉండబోతాయన్నది ఆసక్తికరంగా మారింది.